金融High Tea 2013年4月2日
金融High Tea——趁上半年上市？
2013年4月2日
復活節假期間四出活動，發覺雖然頭一季股市麻麻哋，但證券界好擔心下半年市道更差，叫客戶有公司想上市，要趁快在上半年上市。
你話本地股市上半年好，真係唔係幾覺，至少第一季認真麻麻，好的只是日本、美國，唔係香港。第一季埋單，日股升19.3%最威水，美股杜指升11.3%亦唔錯，經濟好衰的英國升8.7%，連風眼中心的法國亦升2.5%，德國升2.4%，偉大祖國同香港攬住跌，內地上證綜指跌1.4%，香港恒指仲衰少少跌1.6%，哈哈，真係衰到無朋友。
投行預言 下半年差
股市基本上只跟資金供應走，唔跟經濟走，經濟差但係話會大力放水的日本股市係咁升(係，只係話會放水，仲未放)，如果將日本股市今年第一季和去年第四季夾埋計更厲害，升40%，係1972年以來最大連續兩季升幅。每月放水850億美元的美股也不弱，反而係中國由放水變收收哋水，股市馬上轉差，拖埋香港落水底。
復活節假和中環茶友吹水，發覺好多所謂「不合理」的現象，例如日本經濟差股市大升，中國經濟較好但股市麻木。還有還有，本地市面好似好旺，但好多人大歎成本高生意呆賺錢難。
我話一切不合理的現象，短期內會繼續不合理，未必會咁快改變，直至最後突然中止。這些「怪現象」源於各地央行大放水，經濟愈弱的國家愈有條件跟住放，因為佢哋有通縮唔怕通脹，經濟較強的國家怕通脹唯有收水，所以就出現經濟差的國家股市好，經濟好的國家股市差的怪現象，而且這些情況不會這麼快修正，反而會更嚴重。
我又聽到一個計劃上市的老闆話，佢哋趕住6月上市，我問佢點解咁急，唔等好啲價錢才上市？佢話投資銀行家話畀佢聽，今年上半年好啲，下半年會更差，所以想上市要趁上半年上。
我心諗唔係呀嘛，港股只係1月好，跟住2、3月就回，第一季全季夾埋仲要跌1.6%，仲話下半年更差？我估投資銀行咁講，有兩個原因，第一係唔知中國下半年通脹會唔會升得好快，若然如此阿爺會大力收水打壓，即使不一定會如此，起碼中國通脹係一個不穩定因素。第二係美股創新高走一兩個月後，通常會有較深回吐，大約調整5%至10%，怕在下半年發生，雖然美股升港股無乜升，但只怕美股跌市，港股都唔會好景喎。
分拆業務 高價出貨
唔理投行估下半年差的估計啱唔啱，但係大孖沙的行動，似乎都朝這個方向發展，凡是可以批股甚至供股集資的，都急急腳進行，而且仲有17間公司話要分拆業務上市，例如新世界(017)及鷹君(041)話要分拆酒店業務，合和(054)話要分香港地產業務，利福(1212)要拆內地地產等等，當中不少和地產有關，另外仲要加埋長實(001)李超人直接拆售雍澄軒酒店出街，顯示呢啲大孖沙都係覺得中港地產升到咁上下，最好趁住市場還可以，分拆業務上市集資，有胡唔食，罪大惡極。
貴買長揸 好易中招
按我過去的經驗，雖然大孖沙捕捉時機未必係好準，但係佢哋做得嘢，大方向都啱，所以結論係佢哋都覺得而家地產、酒店都好貴，分拆業務等如趁高價沽25%以上出街。另外佢哋亦怕好景不常，怕下半年不如上半年，所以搞得就快手搞啦。
分拆公司上市，例如拆地產業務上市，唔同地產公司賣樓，發展商買樓，好市淡市佢都會賣，以維持公司每一年的業績；但分拆業務上市就幾年都唔做一次，係較有指示性的決定，要麼覺得業務藏在公司內，其價值大家睇唔到，更可能係見物業和酒店咁貴，覺得唔沽就笨。
這裏就衍生一個投資建議，呢一批分拆上市的公司，從大老闆的角度係高價出貨，你買就等如同佢哋對賭，唔係一定唔可以買，買來短炒得唔得睇到時的市道，但長揸就咪制，大老闆對自己分拆出來業務的基本因素，一定熟過你，值幾多錢佢心知肚明，佢沽你買來長揸，小心買咗貴貨。
好多散戶經常問我，佢哋唔係炒出炒入，但係唔知點解手上都有唔少蟹貨，我話佢哋好多時買咗貴貨作長線投資，其中一種係貴買新股。新股上市時有咁大手貨要出街，市道唔好，或者新上市公司的資產價值唔好時，好難上到市，所以上得市大多是市道好時，或者資產價值高時，即係買新股長線投資，買到貴貨機會唔細。
而大集團都是分拆業務上市的高手，以長和系為例，近10幾年拆咗唔少公司上市，包括長江基建(1038)、長江生命科技(775)、TOM集團(2383)、泓富產業信託(808)、匯賢房託(87001)及置富產業信託(778)，最近期的是在新加坡上市的和記港口。
用機械人 節省一半
和記港口雖然唔係在港掛牌，但佢係最新鮮的例子，可以一講。和記港口在2011年3月以1.01美元上市，首日已穿招股價收0.95美元，之後連番急插，好快插穿0.6美元，半年後同年11月底最低見過0.58元，比招股價低42%！股東苦不堪言，若然頂唔順走咗就無仇報啦。捱到2012年隻股反彈，同年2月反彈上番0.85美元，然後浮沉至今，仍然係0.845美元，即係招時買咗揸到今天，仲蝕16.3%。
呢個故事教訓我哋，大公司拆股上市，若果市場夠熱，上市時或者有得炒吓，最極端係2000年科網狂潮上市的TOM集團，但也有上市時已熱度不足的情況，和記港口就係好例子，一上市就插。但你話間公司好差，又唔可以咁講，問題係你在乜嘢時間乜嘢價位買，你在上市時較高價買，就衰到而家。你等佢跌到七個一皮時去買，執番幾成都有機會，關鍵是唔好在上市較貴時買，否則你即使唔係想炒，都等如炒咗。
你可能會話，買新股係希望佢做大，博佢一變十，發大達，好似隻騰訊(700)咁，幾元炒到200幾元。我就話你可以用吓基本常識去睇，如果間公司在內地做互聯網、新科技，佢一變十都仲有機會，但間公司做酒店，而酒店已經升到咁貴，想佢一變十，有無咁易，有時要用吓腦㗎。
講開和記的碼頭，最近有碼頭工人罷緊工，要求加薪，工人多年人工加得少，境況值得同情，但問題是香港的碼頭已慢慢步向夕陽行業，生意比內地搶晒，無乜增長，所以要碼頭公司大加費用畀外判商，讓佢哋加人工畀工人，唔係有好大空間。我聽一個經營碼頭的大孖沙講，碼頭好多工種可以用機械人代替真人工作，以荷蘭鹿特丹碼頭為例，一個機械人的每月成本約6000港元，反觀香港請個碼頭工人要1萬多，用機械人節省好多。但碼頭公司賺開錢，即使無乜增長，都唔想改用機械人而炒咁多碼頭工人，但有咁便宜的替代生產方便，碼頭公司亦好難加工人的人工了。但經今次工人罷工一役，無論結果如何，碼頭公司可能為避免未來麻煩，會加速機械化，本地職位又會減少，長遠會打爛唔少飯碗，這種結局，真係相當無奈。
陸羽仁
上一頁 下一頁
金融High Tea 舊文