金融High Tea 2013年4月5日
金融High Tea——亂炒概念 走得就走
2013年4月5日
本周三清明節假前外圍美股升，但港股仍要跌30點，到周三晚美股杜指跌110點(不知昨晚有無反彈)，港股唔跟美股升，唔知跟唔跟美股跌啦。
港股弱勢紛呈，人升香港唔升，又或者托住匯控(005)和中移動(941)兩隻大股派其他股，都唔係好兆頭。有人迷信稻香推「一蚊一隻雞」的時候就有跌市，又或者鄭少秋出劇多數唔老黎，我就話唔使睇迷信嘢，貨櫃碼頭罷工未停，內地又爆H7N9禽流感，呢啲衰嘢實質好多，若要搵藉口隊個市，呢啲事都係好藉口。
貨櫃碼頭工人返工時間長，人工無增長，的確令人同情。但與其話呢個係李超人剝削，不如話係香港哀歌。我有親戚揸貨櫃車，佢話20年前香港剛剛超越荷蘭鹿特丹成為世界第一貨櫃港時，也是他們搵錢最多的時候，一個月搵兩萬幾銀，以當時的生活水平好好使，所以有唔少同業多錢到可以在內地包二奶；後來內地碼頭興起，收入漸減，佢也轉行，覺得揸貨櫃車無得做。香港好多嘢都曾經好景，但最後都被淘汰，因為人工等生產成本唔夠人地平，香港慢慢步入日本等發展國家的後塵，生意流失，打工仔和老闆砌過你死我活，因為個餅唔會大，只係你食多啲定我食多啲的零和遊戲。
和黃好難燒上身
李超人當然睇通個局，唔係都唔使兩年前叫和黃(013)將包括香港碼頭在內的珠三角碼頭業務，分拆成和記港口信託公司在新加坡上市，大幅減持八成以上，變相賣走大部份生意。和黃持有和記港口減到兩成以下時，和記港口當然不再是和黃附屬公司，連聯營公司都唔係，不再需要將和記港口併入和黃帳目內，只變成一個投資，有錢分就分，佢盤數唔靚亦唔多會影響到阿媽，可見李超人有幾睇淡和記港口業務。由於持股太少，所以和黃叫和記港口派多啲水畀外判商加碼頭工人的薪水，本來也只是慷他人之慨，加10蚊和黃只貢獻兩蚊而已。但估計和記港口之所以唔讓步，係唔想俾李卓人個職工盟成勢，怕影響到其他生意也陸續爆工潮。總的來說，碼頭罷工對和黃影響極微，不過若罷工曠日持久，香港轉口港業務會受影響。
另外，講講H7N9禽流感，雖然在內地多處都有感染個案，但我向官府中人傾過，雖然佢哋都好緊張，怕香港受影響，但估計機會不太大，第一而家已是四月，開始暖和，愈熱愈不利流感散播。第二是禽流感主要是由野鳥傳播，天暖候鳥轉向北飛，所以無乜雀會向南飛落香港，減少香港中招機會。而且內地暫時也未看到大面積人傳人式的感染，主要是禽類接觸者染病，所以不用太擔心。當然食雞最好煮到全熟至好食，唔好打邊爐煮到半生熟就質落肚。
泰凌亂升搵老襯
一話禽流感，就有人走去買藥股，但純炒概念，走唔切好易輸死人。周三最誇張係泰凌醫藥(1011)大升17.7%，收市報1元，成交額有1,309萬元。另外，朗生醫藥(503)亦升7.1%，大隻啲復星醫藥(2196)升近2%。
唔見隻泰凌升咁多，唔去睇吓佢搞邊科，一睇就精采啦，隻股2011年新上市，上市那年賺2.3億元人民幣，剛公佈舊年轉為狂蝕11億人民幣，核數師仲對帳目有保留，真係經典過經典。泰凌巨虧部份源於將主要業務斬掉出現6.8億重組成本，包括退出疫苖銷售和大部份第三方藥品銷售。重組後泰凌2012年收入只有7.4億，比前年的27.6億大減73%。重組後去年毛利只有2.7億，比對上一年的8.9億大跌70%，縮哂大水。嘩，上市年幾就話主要業務唔得要斬掉，有無搞錯？業務真係一兩年內突變？
泰凌2011年上市價4.54元，家得番1元，大跌78%，不過唔好嫌少，我估有得升唔走仲衰。家炒吓禽流感概念，第一唔知內地禽流感爆唔爆得大，第二亦唔明禽流感即使爆大佢點解係主要受益者，佢疫苗生意都斬埋，即使疫苗賣都益唔到佢啦。不如話有人借機炒高散貨，你走埋去掂就老襯啦。炒禽流感股，都係搵笨居多。
陸羽仁
上一頁 下一頁
金融High Tea 舊文