一周三件：百仕達睇1.1元 - 錢雋
■鄧銳民任主席的百仕達，筆者認為集團現金流足，有機會整壇大龍鳳。資料圖片
百仕達(1168)每股淨現金係現價嘅1.8倍，話百仕達係內房股，不如話佢係等變身嘅純現金股，可能仲貼切啲。
百仕達到上年尾，現金約41.6億銀，借款只得2.8億銀，淨現金高達39億銀。百仕達市值21.3億銀，淨現金係總市值1.8倍。同上次主打姊妹系威華達(622)一樣，以每股0.61元買入百仕達，相當於揸住集團每股淨現金約1.1元。
數未計完，當百仕達上到每股淨現金值，仲仍然相對NAV 2.13元折讓48%！即係話，現價買百仕達，亦係免本揸住集團手頭資產物業，證明百仕達係超級無倫殘到爆。
博大龍鳳有贏面
百仕達深圳「紅樹西岸」上年全部沽清，家陣有位於上海外灘同長寧區兩個project，無疑係超級靚嘢，但曬士唔大，再之後，亦無嘢跟尾。又大股東歐亞平出任由三馬牽頭的「眾安保險」掌舵之後，亦退任百仕達主席職。嚟緊百仕達三條出路：
(1)百仕達近幾年好似唔食人間煙火，再冇大搞作。若果真係無心戀戰，仍然有機會派大息，再拍戶好人家賣殼，多條出路，大、小股東仲開心。
(2)百仕達發憤，趁阿爺調控樓市之際出擊，等日後NAV同成績表，有再增長空間。又好保守當百仕達借貸70億銀，淨負債比率都係35%，而可動用現金，已經過百億銀，足夠集團整壇大龍鳳。
(3)百仕達keep住現狀，冇大改變。話曬，單係集團利息收入，都過1億銀，足夠cover所有高級管理層袍金加花紅(上年1,429萬銀)有凸。
三條出路，三分之二chance面，有機會係大龍鳳，值博。呢轉博百仕達，齋上返淨現金值1.1元，係要升80%，都肥仔啦。
錢雋
細價股專家
本欄逢周二、三、五刊出
上一則: 金手指：不問價追中慧 - 孫柏文
下一則: 板塊尋寶：金山半個月博升兩成 - 王昇
一周三件 - 錢雋 舊文