魚樂無窮：短線博彈寧揀消息股 - 唐牛
■港府有意放寬雙倍印花稅換樓期限，變相為樓市減辣不妨留意地產代理股美聯。資料圖片
說好的反彈終於來臨，仲要一劑畀夠400點大家，算係沙漠中嘅一點清泉，不過，究竟噚日有幾多人贏錢呢？根據非正式統計，唐牛身邊十個戰友，最多只有兩個係贏家，其餘八個唔係戰死沙場，就係全身而退。事實上，上星期五上過某大中資證券行同經紀戰友聊天，靜焗程度同自修室冇乜分別，同年初殺聲震天、忙到甩轆嘅情況，形成強烈對比。不過，正因為買賣兩閒，挾倉先可以咁清脆利落，單從呢個因素睇，後市有力再衝多轉。
現階段如果想坐轉順風車，有消息跟尾嘅股份相對值博，起碼唔係齋炒咁簡單。咁邊隻股近期有最多消息？肯定非騰訊(700)莫屬——星期三公佈季績、星期四正式為一拆五除淨。雖然上次公佈全年業績前一個星期，股價一直有跌無升，但如果拉遠啲睇，其實早幾個月已經price in咗業績因素。相反，今次放榜前完全冇升過咁滯，大有挾淡倉誘因，配合拆細再炒上，一旦突破起自3月嘅下降軌，短線可見550元。
樓市減辣炒美聯
地產股同樣有利好傳聞，港府有意放寬雙倍印花稅換樓期限，例如二手現樓將由臨約推遲到正式買賣合約起計算，變相為樓市減辣。地產股聞雞起舞，長實(001)、恒地(012)升近半成，如果想追落後，不妨留意地產代理股美聯(1200)，雖然業界指今次減辣無助二手交投，但近期盲搶盤消息漸多，加上美聯不足一個月由高位插水三成，丁點好消息已足夠落鑊。
唐牛
上一則: 炒友Blog：鎢價上漲洛鉬有睇頭 - 邱古奇
下一則: 股場放大鏡：華電福新有力升42% - 歐陽風
魚樂無窮 - 唐牛 舊文