異動空間：追貨定係趁高沽 - 魏力
三條藥引觸發港股技術反彈(排名分先後)：一、騰訊(700)季績憧憬加拆細；二、市傳港府將放寬樓市辣招；三、「新國九條」略為提振A股信心。由於事出突然，淡友倉皇平倉，令反彈氣勢更盛，午市最多飆537點，真係挾到你唔信！埋單22261漲398點，50日線(22272)前止步；成交671億元，誠意只屬一般，始終新經濟股遭血洗過後，大戶散戶都元氣大傷，要重拾戰意不易。
追貨？趁高減磅？候高再沽？人人倉位不同，不能一概而論。策略上如成功避過呢輪洗倉，家陣冇貨在手，或近排只係輕傷，實力仍在，可小注博二三線績優股，但難度風險都高，純粹當止痕，嚴守8%止蝕。相反，如蟹貨纏身，就無謂加注或溝貨了，一動不如一靜，或趁高減磅，留番多少子彈傍身。績優股可選信義光能(968)，滙證最新報告睇2.5元，認為其基本因素佳，可繼續受惠政府對太陽能發電場裝置的補貼，但人仔貶值為風險之一，短線反彈目標為20日線2.17元。同為光伏股，卡姆丹克(712)走勢差劣，但於1蚊關大成交守穩後，昨反彈3.8%，形成「早晨之星」見底形態，超賣反彈睇1.3元。
魏力
http://www.facebook.com/2012jason
上一則: 何車500：海通國際風險低 - 何車
下一則: 青心直說：升市言之尚早 - 胡孟青
異動空間 - 魏力 舊文