中環在線：擔心商場生意差吳天海護九倉「削自由行 = 封港」 - 李華華
■(左起)袁莎妮、吳天海同阮蘇少湄遊船河，有講有笑。易仰民攝
香港總商會為慶祝成立153周年，噚日花近200萬元舉行「全程為您」活動，請市民與遊客全日免費搭電車與天星小輪，係第四年舉行同類活動。九龍倉(004)副主席吳天海喺活動後被問到點睇政府有意削減兩成自由行，佢即刻表示反對，形容咁樣做，好似將自由港「自動封港」。
九倉旗下尖沙嘴海港城與銅鑼灣時代廣場，近十年受惠於自由行旅客，政府有意限制自由行數目，自然首當其衝，吳天海當然有話要說。佢話，唔想見到限制自由行發生，「當你個自由港呢樣又唔自由，嗰樣又唔自由，其實係自動封港」。
佢認為，此舉對香港自由港形象有根本性損壞，「唔敢想像今時今日嘅香港冇咗自由行會點」。不過呢個只係政府初步構思，佢深信政府會周詳、審慎咁諮詢同考慮。
遊船河派環保袋
他又話，自由行主要分兩種，一種係水貨客，另一種係來自北京、上海嘅旅客，相信限制對以水貨客消費為主嘅新界北區商場影響較大。至於對九倉旗下商場嘅影響，咁就要視乎政府政策。
吳天海噚日其實係以總商會副主席身份出席活動，佢跟總商會總裁袁莎妮下午換上大會T恤，一齊坐天星小輪遊船河，由中環過尖沙嘴，再由尖沙嘴去返中環，身兼總商會理事嘅中電(002)副主席阮蘇少湄亦有到場。
佢哋喺船上向乘客派發印有商會logo嘅環保袋。袁莎妮估計，全日有30萬人受惠，希望市民因此對商會加深認識。
李華華
mailto:LiWaWa@AppleDaily.com
【壹錘定音 . 李慧玲】6月4日正式開咪!
收聽方法: 請留意【壹錘定音】facebook專頁！
https://www.facebook.com/hammerout.hk
上一則: 樂香園：黃錦星沒有說的話 - 密西比
下一則: 中環在線：必瘦站唔驚淡市潮興扮靚防小三 - 李華華
中環在線 - 李華華 舊文