一周三件：天津港超抵買
■天津港發展食住一帶一路同自貿區兩個重要國策，明顯好有前途。 互聯網
天津港發展（3382）食住一帶一路同自貿區兩個重要嘅國策，在港口股中，明顯係好有前途，趁呢期天津港跟H指下跌，好長收集。
呢期阿爺重點嘅國策，係一帶一路，之前提過係，據世銀估計，呢個同歐亞鄰近國家雙贏嘅經濟策略，在未來六年內，激起亞洲區基建投資嘅需求，高達一萬億美金。諗到嘅係，隨住大計一路推進，對原材料、資源同運輸，都起到提振嘅作用。
受惠國策及需求增
再睇天津港，係全球第四大港口，而喺上年尾，國務院批准天津港口岸對外開放水域一千一百二十平方公里到一千五百九十平方公里，批准新建碼頭泊位，由原先七十五個，起個孖到一百四十六個。又全國省市，得天津市係同時有四條通往歐洲鐵路。睇到嘅係，天津港獲阿爺祝褔，鞏固港口優勢之餘，亦都得天獨厚，有多條鐵路優勢，尤其未來喺海鐵聯運互為刺激底下，加大對港口需求。睇前景，天津港肥仔水。
天津港一年嚟累升咗34%咁大把，而集團唔係滬港通股份，更加唔係金融股，但前日阿爺打券商，天津港都無厘頭俾資金質，現價（1.60元）PB得0.69倍，已經係場內至平一隻港口股。同樣喺天津區內，食住一帶一路同天津自貿區concept等等海運物流股，好似天津海運，一年嚟翻咗一番，家陣PB高達200倍、津濱發展9.2倍、渤海租賃2.4倍。
又天津港旗下嘅天津港口，一年大升咗1.4倍，家陣2.3倍PB，天津港殘到冇譜。而祖國證券報載，引述多名知情人士話，津閩粵自貿區將喺三月一日掛牌。好事近，買天津港，當上番NAV2.34元咁計，係要升46%，到時，集團比起天津港口PB，仲講緊有五成折讓。
錢雋
細價股專家
本欄逢周二、三、五刊出
錢雋
一周三件 - 錢雋 舊文