中環在線：陳家強捧場 梁振英招待
高官爭住見克魯明
■被問到中國政策，克魯明即刻封口，果然好知國情。
二○○八年諾貝爾經濟學獎得主克魯明（Paul Krugman）果然有魅力，佢專誠飛來香港出席亞洲金融論壇（AFF），噚日做演講嘉賓，財經事務及庫務局局長陳家強、證監會主席唐家成等財經猛人捧場外，特首梁振英傍晚又喺禮賓府同克魯明會面。
■梁振英（右）同克魯明會面，似乎冇乜火花。 「香港樓價好crazy」
唔知梁振英與克魯明見面時有冇些少尷尬呢？大家應該仲記得梁振英舊年接受外媒訪問時提到，如有公民提名，政策或向月入14K（萬四蚊）以下嘅市民傾斜，克魯明之後撰文質疑梁振英嘅講法有袒護財閥之嫌。
此外，克魯明噚日都形容香港樓價好crazy（瘋狂），梁振英咁關注樓市，唔知克魯明有冇醒幾條好橋佢呢？
可惜噚日政府只係發新聞稿話梁振英向對方介紹政府發展經濟嘅政策方向、香港繼續推動離岸人民幣業務雲雲，就冇提克魯明有乜意見，齋睇相，克魯明蹺起腳又好自在咁，唔似有火花。
講番噚日中午克魯明嗰場演講，陳家強與唐家成齋做觀眾，全程好留心咁聽，但係就冇喺問答環節期間舉手問問題，可能費事俾人大做文章喇。
現場觀眾就最關心美國聯儲局幾時加息、中國經濟會唔會一直轉差等。佢估計美國今年加息機會微，至於點睇國家主席習近平嘅政策，克魯明即刻以「唔熟悉，冇頭緒」為由拒絕回答，咁就梗係啦，聞說克魯明完成香港之旅，下一站去內地交流，佢都想成功北上㗎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文