中環迷你裙：砂糖與便便之間
■Samantha身邊十個炒開股的戰友，九個半都唔贊成新設冷靜期。 資料圖片
上篇提到「家陣沽A股，你唔敢贏呀？」當晚中證監隨即落柯打，滬指出現恐慌，出現六年半最大跌市。Samantha股齡尚淺，眼見逾八十隻滬股通跌一成時，心情就好似《婚姻介紹中心》潮文中所描述「好X開心，但係又好X擔心嘅感覺」，後者當然係擔心個倉（即時清曬啲孖展），開心係因為今次A股這堂課狠狠地摑了李小加一巴！
無論港交所（388）今次推出升跌停板、冷靜期有多長，只限於恒指H指成份股，身邊十個炒開股的戰友，九個半都唔贊成。早年入行，老細提到「股市不外乎供應和需求」，年幼無知還一笑置之，家陣笑唔出，因為開口埋口都係「市場化」嘅阿爺，原來真係唔知股市（market）為何物㗎！
大跌市時賣盤多過買盤是常識，市場機制下有買有賣，自己沽低咗，輸錢都叫心甘命抵，惟當日出現跌停板股沽都沽唔到的慘況，你畀中曬「冧把降」的大陸股民多晚冷靜期又點？最終咪越諗越驚，第二朝咪又係羊踩羊。
或者阿爺真心想教育股民，但是又想馬兒好，又想馬兒不吃草。A股估值人人都知貴，阿爺在市況失控前使出兩招打孖展，換來市場恐慌掟貨，這邊阿爺又急澄清，限制孖展並非打壓股市，真係一啖砂糖一啖屎。點Jack，我好混亂囉。
Samantha
https://www.facebook.com/stocksamantha
本欄逢周三、五刊出
Samantha
中環迷你裙 - Samantha 舊文