異動空間：雷布斯出手啟示
大市技術反彈無謂睇也無謂博，大減價應該仲有一排，毋須咁急買，送錢畀人，所謂撈底梗係知道個底喺邊先出手，每跌一棍就接一點，接極都未到，撈底就變淆底，最後在最低位打曬，例子多不勝數。
究點先知個底喺邊？最簡單就係低位大成交，大陽燭反彈，最好係出現壞消息後低位破腳穿頭，升穿埋之前一日高位，例子有中聯重科（1157）盈警後早段先插7%，之後低位反彈12%，成交係上日兩倍，未買可吼位上車。
想講嚇金山軟件（3888）。被稱為雷布斯的雷軍手上有兩大王牌，一叫小米，市值三千五百億元，專門做硬件，用性價比殺出血路。另一係金山軟件，市值只二百億，但由網遊、手遊、防毒軟件、辦公室軟件、瀏覽器以至雲端服務，一應俱全。一硬一軟，小米及金山可謂天衣無縫。雷軍多次表明，小米五年內唔會上市，但日前就斥資逾五億元，入股金山軟件2.98%，可說是開拓戰略合作第一步。
值得留意今次雷軍以每股約十五蚊增持，較去年高位低一半，無疑話畀大家知：金山軟件見咗底！集團去年業績應麻麻，但炒股睇前景，雷布斯都出手可以即管跟一轉。
魏力
http://www.facebook.com/2012jason
魏力
異動空間 - 魏力 舊文