陸羽仁 BLOG 2015年1月21日
7年代
2015/01/21 08:40:30
網誌分類: 經濟
中國為經濟放慢和結構調整改了個好聽的名字叫新常態，這個新常態正逐步兌現。中國昨日公佈的2014年經濟增長(GDP)為7.4%，增速係24年以來最低。而國基會（IMF）認為中國經濟今後的增長，還會放慢，今年會降至6.8%，明年再降至6.3%。我就估阿爺自訂的今年經濟目標會維持在7%或以上少少，頂住7年代，聽講克強總理怕經濟放得太慢。
據CNBC報導，經濟學家普遍認為中國今年，甚至往後的經濟增長將踏入告別「7」的年代，主要原因係中國過往以信貸推動、投資為導向的增長模式正在耗盡增長動力。而拖累經濟增長的元兇係房地産行業，在內地，房地産是經濟重要支柱，佔了GDP大約15%，而且直接影響包括鋼鐵到建造的數十個其他行業。
蘇格蘭皇家銀行（RBS）大中華區首席經濟學家高路易（Louis Kuijs）指出，盡管大宗商品價格下跌應支撐中國多個行業利潤率，但考慮到需求乏力的前景以及數個大行業産能過剩，佢唔認為2015年中國企業投資勢頭會顯著改善。
不過CNBC財經節目主持Jim Cramer就唔係睇得咁淡，佢話中國第4季有近7.4%增長，令全年增長維持在7.4%，已被佢預期第4季只有7%增長好。佢認為中國服務業佔比快速增加，係佢睇好的主要因素，總結係「無想像中咁差」。
無論如何，中國係全球第二大經濟體，經濟將會繼續放慢的消息，即時令到稍為喘定嘅油價，再度下跌。紐約原油由接近每桶49美元，跌4.7%至每桶46.65美元。對於全球經濟放慢的憂慮，加上大摩及強生（Johnson &Johnson）昨日公佈季度業績，都唔靚仔，營收都差過市場預期，股價受壓，其中強生跌近3%，係表現最差杜指成份股。杜指由升轉跌，中午一度跌過265點。
不過投資者見到中國經濟增長不及預期，對於中國政府可能推出刺激經濟措施救市隨之而升溫，匯豐首席經濟學家屈宏斌昨日便表示，在全球經濟復甦不確定、房地産市場疲弱的情況下，提振國內需求、維持增長，需要更激進的寬鬆措施。佢預計，2015年人行將減息半厘。加上歐洲股市在市場猜測歐洲央行將在本周的政策會議上宣佈推出大規模的量化寬鬆計劃，以便刺激歐元區經濟擺脫通縮危機，升至7年以來新高。美股下午氣氛又再度活躍起來，股市恐懼指標VIX指數跌番5%至20水準以下，推動美股昨日起死回生，美股中午12點一直炒番上去，最後杜指升3點收市，後低位升番262點，都好戲劇性。
而家全世界都係咁，經濟唔好，就炒放水，放水股市就升，所以A股雖然出現一個黑色星期一，都唔使睇得太淡，阿爺無招，都係放水招，升得太急要回吐，調整完再升，唔好期望佢升得太急，慢慢上仲好。
陸羽仁
回應(1) 我想回應
陸羽仁 BLOG 舊文