金手指：香港贏大陸之戰
■中原施永青表示，因地產代理競爭白熱化，中原擬重啟上市方案。 資料圖片
上周二孫柏文同個獅子山學會支持者食晏。佢每年都會捐錢畀我哋，佢人生經驗豐富，故約佢出來問嚇我哋有咩改進嘅空間。除會務外我都有問佢關於國家趨勢、世界大事。因佢做嘅生意，除咗喺香港，喺大陸亦係
極少數香港公司喺個行業做龍頭。佢做開門市，我問關於啲網上對手，佢話啲對手喺香港都冇威脅，但喺大陸啲對手冇道德咁打。即啲客搵佢對手時，啲對手公然叫啲客去佢公司睇貨，睇好先返網上買。仲要以本傷人，零利潤咁打，甚至蝕住補貼啲客。
打持久戰最緊要資金
咁我話大陸信貸泡沫爆破，對手應冇咁勇去燒銀紙。但佢話就算收斂，都係持久戰。持久戰？即係要資金囉？我問。佢話都算係。咁我知佢嗰間公司冇上市，所以就問：「咁會唔會考慮上市？但我聽過你唔上市，係因你同其他股東喺上市上有分歧。」佢話公司多年來唔上市，最大原因係冇資金需要。同埋上市就要對小股東有承擔。我聽到都覺得可惜，因香港股市就係需要多啲對股東有承擔嘅人。但「你自己都話喺大陸要打嗰場仗係一場持久戰，為保龍頭地位可能真係要諗上市」。
去到呢刻，喺商場打滾咁多年嘅佢冇出聲，我就轉向同我同行嘅獅子山學會同事白仲祺話：「頭先嘅對答，就係好典型以前喺鏡頭前做節目時嘅對答。哈哈！」點知翌日，我一開facebook，就見人分享一篇題為「代理競爭白熱化中原重啟上市」嘅新聞。睇緊段新聞時，同事白仲祺來短訊問：「施老闆今日咁宣佈，你話係咪因噚日個lunch？」我作為一個只理事實嘅人就答：「冇錯！百分百一定係同我哋食晏時諗到嘅！」
喺呢到祝望施永青同佢啲拍檔講得掂數，上到市同大陸人爭一日長短。因睇網上紅磡站出面嘅melee，香港贏大陸之戰，香港最好打嘅就一定係地產代理！
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文