智取大市：優質工業股唔跟熊市走
上個星期二，人民幣貶值殺大家一個措手不及。喺市場信心不足之下，中央又要做多呢嚇大動作，只會令市場信心更為不足。無論中央做乜，大家都焦慮，呢個都可以話係熊市特色。
港股短期走勢，當每次成交縮得極少，就反映沽壓減少，大市有可能出現短線反彈；但當成交開始增加
，持貨者又會趁機高位減磅，形成假突破，相信未來日子都會保持呢種走勢，如是者，令到買家越玩越冇癮，然後成交越嚟越少。
大市要見底，有一個條件必須達成，就係成交額唔再下跌，至少保持一段時間橫行，然後出現價量齊升，情況一如2003年8月份，全月成交突破咗3年嘅單月成交額，就成為見底徵兆。
至於而家相比2003年係兩個世界，港股牛熊市周期相比以往短得多，用周線圖量度成交何時見底，相信較2003年用月線圖觀察更管用。晉佳估計今個星期恒指成交只會進一步萎縮，指數有反彈、冇升幅，應係常態，即係話要等市況出現轉機，秘訣好簡單，就係「耐性」兩個字。
東江受惠人幣貶值
悶市之中，有無炒強勢股嘅機會？最有條件升嘅係優質工業股，或者係股災之下未見財政實力出現大損傷嘅本地薑莊家股，蘋果投資版見報率非常高嘅東江集團（2283），應該係好選擇。
東江主要從事注塑模具及組件嘅設計及製作，睇佢啱啱公佈今年上半年業績，純利按年增長34%，至7,120萬元，每股盈利8.6仙。過往下半年先係東江嘅旺季，收入相當於上半年嘅1.5倍，而下半年每股盈利更通常超過上半年嘅1.5倍，全年保守估計可能達到21.5仙，預測2015年市盈率12倍唔夠。
內地經濟放緩，做廠定單可能少咗。需知道東江客戶夠曬星級，蘋果、GoPro等等，一嚟證明佢夠曬優質，二嚟呢類尊貴客戶嘅潮流人氣產品喺全球以至內地需求未見減少，令東江比較有條件喺內地經濟偏弱之時，保持收入表現。
佢係人民幣貶值受惠股，因生產基地主要喺內地，只有大約一半收入來自內地，約一半係出口，所以佢係少人提及嘅人民幣貶值受惠股。
優質工業股對於內地經濟差、人民幣貶值、中央凍結A股市場等等不利消息都係免疫，投資者要逆市搵避風塘，係唔錯選擇。至於東江，中線要博破頂，先睇3.5元。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文