中環在線：
跑二千級樓梯 郭基煇好輕鬆
22分鐘完成慈善跑
■開跑一刻，大家都好有鬥心。 楊柏賢攝
新地（016）每年一度喺九龍站ICC舉行嘅跑樓梯大賽「公益垂直跑」，今年已經係第4屆，多名執行董事都有參與。踩開單車、身材好fit嘅新地「第三代」郭基煇（Adam），輕鬆以22分鐘跑
完2,120級樓梯，明顯快過阿叔、新地主席郭炳聯。
舊年冇參賽嘅郭炳聯，用咗40分鐘左右跑完，比起前年紀錄大概慢咗10分鐘，不過又咁講，郭炳聯今年已經62歲，可以一口氣跑超過2,000級樓梯都算係咁，佢起跑前透露，比賽前曾經練習過一次，仲猛話好辛苦。
■郭炳聯（右）在終點與參賽者擁抱勉勵。 盼與父郭炳江一齊跑
做緊執董嘅32歲郭基煇今次就係第2次參賽，完成時間跟舊年差唔多。郭基煇話，跑到50層至78層時最難捱，最終可以堅持走到終點，對成績感到滿意。
郭基煇本身係單車迷，佢喺賽後提到，兩個月前去咗台灣環島遊，玩足4日3夜，明年1月又會參加香港另一場慈善單車繞圈賽，認真夠健康。
佢指，今年「垂直跑」有超過1,600人參加，籌到超過600萬元，雙雙破紀錄。不過，父親郭炳江仍然在獄中等候上訴，郭基煇都好感觸咁話，跑完後好掛住爹哋，因為兩父子舊年一齊參賽有講有笑，「希望佢可以快啲出嚟，同我哋一齊再跑過」。
除咗新地嘅高層，政務司司長林鄭月娥，兩個受惠機構社聯與公益金嘅主席，分別係陳智思同李慧敏，噚日都著上運動裝出席起跑禮，不過就冇落場跑。
61歲雷霆跑完ICC去賣樓
新地（016）副董事總經理雷霆平時西裝骨骨主持新盤宣傳活動，噚日難得見到佢換上短褲、運動衫跑樓梯。估唔到已經61歲嘅雷霆都幾跑得，用咗29分鐘就跑上ICC「天際100」終點，比郭基煇只係慢7分鐘左右。
郭基煇賽後爆料話，雷霆原本安排咗晏晝4點要出席新盤活動，「垂直跑」兩點鐘先至起步，佢仲擔心雷霆趕唔切，點知雷霆半個鐘都唔使就完成賽事，郭基煇講笑咁話，叫佢下次將啲宣傳活動，提早到兩點半開始都得。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文