笑到最後：
電影股等扶持博唔過
終於到市場氣氛較散漫的12月，因為聖誕節關係，而港股又係白人機構投資者主導市場，聖誕節等同白人社會農曆新年，白人投資者都準備返鄉下，過埋新年先返香港。
創科28蚊平手走
市場投資者不奇然都會冇乜投資意欲，加埋聖誕新年兩日半市，假期氣氛實在太濃厚。正如本
欄之前所言，今年餘下時間都冇乜大動作，寧願安安份份過埋年先算，不如檢討之前推介。想講係創科（669），高明今季在本報「周日投資導航」推介過，28蚊買入，目標價33蚊，11月9日單日一閃即逝見過33蚊，應該冇乜邊個可以高位沽到，之後本欄建議30蚊樓上先沽出一半，近期股價下滑，跌穿30蚊，上個星期五收報29.8蚊，繼續建議餘下一半離場價28蚊，即使平手走都仲有另一半已食糊。
另一隻想講就係美股Activision Blizzard，11月9日本欄推介，覺得遊戲商拍埋戲，有機會變迪士尼，當日推介時股價33.96美元，上周五報38.89美元，暫升14.5%。此股11月初由37美元回落到33美元，12月竟然仲可以畀人買返上去39美元歷來高位，即係有人追捧緊。
近期雖然港股炒電影股，但始終買電影概念，還是美帝好，因為香港電影製作已經淪落到要靠政府支持，早年搵納稅人科水整個基金拍戲，最近又有「香港版權大聯盟」支持「網絡23條」，希望透過政府權力去保障電影收入，但其實部份港產片質素下降先係收入下跌元兇。
一般行業例如的士業，要政府協助打壓Uber維持收入，即係行業已步入黃昏，但仲有壟斷經營權頂住。最要創意嘅電影行業，一心只想政府打救，即係從業員只係想做公務員。股市係買對未來憧憬，公司唔博就唔會有憧憬。循規蹈矩而股價會升，只有政府發牌壟斷行業，但當有新科技如Uber出現，牌照都未必保障到收入。
更何況冇壟斷權嘅電影業，用公務員心態去經營，惟一憧憬元素可能只剩下政府大手補貼等政府包養，好似中國國策扶持股咁。與其睇好同樣電影概念，不如去美股博一博仲好。最後，本欄反對任何形式「網絡23條」立法，因為一旦立法，識上facebook都會中招，執法機關又有多條法例去選擇性執法，即使告你唔入，搞上法庭已經令人身心俱疲。或者呢個先係立法原意。
高明
https://www.facebook.com/bigricetea
本欄逢周一刊出
高明
笑到最後 - 高明 舊文