金融High Tea 2015年12月11日
內房股起哄
2015年12月11日
港股繼續悶跌，恒生指數六連瀉，收造21704點，跌99點；國企指數收9450點，跌108點，成交金額689億元。不過，個別板塊有炒作，電力概念同內房股表現唔錯，尤其有消息跟尾內房股萬科(2202) 同遠洋地產(3377) ，依家短炒買中呢類特殊情況股份又及時食到胡，就真係飲得杯落。
萬科爭霸搞起氣氛
萬科早前出現雙雄爭霸之局。萬科以前最大股東係央企華潤，不過，年前開始，民企鉅盛華股份沾手，就開始同華潤角逐大股東地位。
兩星期前鉅盛華股份、前海人壽密密吸納萬科A股，單單在上周便一口氣以近百億元人民幣，增持5.49億股萬科，令持股增至20.008%，踢走央企華潤，重奪萬科大股東寶座。當呢單交易曝光，外界預期華潤以大型央企身份，對呢間龍頭地產公司控制權不易放棄。
同一時間，內地保險商安邦加入連番增持的萬科(2202) ，令公司股價進一步造好，現為升幅最大的國企指數成份股，最高造22.21元，成交近3%，但高位出現食胡沽盤，收市報20.85元，倒跌3%。之前我俾呢隻股的入市位係19元，我覺得炒作消息股唔可以跟得太貼，否則好易中招。
由於安邦加入搶熱大餅，佢早前從南豐買入股權的遠洋地產(3377) ，股價同樣一度受捧，最高造5.28元，可惜尾市無力，收報5.03元，升幅縮至1.8%。
昨日四隻新股掛鈎，一如預期係跌多升小。由新世界發展(017) 創辦人鄭裕彤女婿杜惠愷持有的機電工程服務供應商豐盛機電(331) 最差勁，潛水25%，收報2.06元，較招股價2.75元，下跌0.69元，一手1000股已蝕690元。最叻係從事建築機械業務的焯陞企業(1341) 收報0.53元，比招股價0.48元，高出10%，一手8000股賺400元。
至於鷹君(041) 創辦人羅鷹石么子羅啟瑞經營的建築公司新福港(1447) 收報1.32元，較招股價下跌2%。市值最大的電力解決方案供應商中國能源建設(3996) H股都破底，收報1.58元，比招股價1.59元，下跌0.63%，一手2000股帳面蝕20元。
散股學啤殼小心中伏
做咗多年新股客的散戶慨歎，現時打新難搵食。佢玩股三十年，過去對申新股興趣甚濃，由已故交易所主席李福兆主政年代已認投新股，當時新股上市極少，集資三、五億元已是大嘢，當年買新股多數有賺，皆因李校長要求上市公司配股畀經紀，對訂價把關甚嚴，要預留水位畀中飛者。
九十年代國企H股開始來港上市，到二千年科網股狂潮，都係抽新股黃金時代。當時佢抽中阿里巴巴，上市兩日沽貨，回報一開四。呢個情況喺近幾年開始改變，而且急速惡化，現在抽新股輸多賺少，仲要中親大大煲，變成賺粒糖、輸間廠，故此現在新股上市，十有九隻佢都唔吼，所以佢都唔明點解咁多新股可以夠飛上市！
新股難搵食，於是有人就想向上游尋覓機會。有周刊報道，有集團式兜客認購「原始股」，即係買未上市嘅公司股份，然後等佢上市發水賺一筆。呢個概念講起來好吸引，關鍵係有無咁大隻蛤乸隨街跳。呢間兜售原始股嘅集團部份落足本搭個棚，整埋店舖出來做示範，睇落似模似樣，部份仲懷疑同上市公司高層有關連，係唔係要查過至知。不過，買這些「原始股」，先唔好講佢係流嘢無件事，就算佢係堅，佢賣出股份價錢係幾多先？以依家市況，就算真係上到市，都唔包實賺喎，仲唔計係上市過程前要食晒驚風散？
呢類賣原始股的大龍鳳有得做，講穿就係兩個原因，一係新股難玩，老散要另覓搵銀之途；二係依家上市多到眼花繚亂，好多都係啤殼出售，街邊小股民見大戶啤殼啤得咁過癮，自然想分一杯羮，所以一聽有原始股賣好易以為有得執，結果隨時貪字變個貧！
陸羽仁
金融High Tea 舊文
來源 source: http://hdfin.stheadline.com