中環在線：救A股不力 熔斷累股民
網民鬧肖鋼 借「肖邦」過橋
■A股不停出事，中證監肖鋼都冇時間染黑頭髮。
中國證監會今年初推行熔斷機制，嚇到環球股市散曬，雖然熔斷機制實施4日就叫停，但A股依然不濟，內地網民怒氣未消，繼續日日鬧爆中證監主席肖鋼！
內地網民確係好文采，透過創作故事去
鬧人。有網民借走憂鬱曲風嘅波蘭鋼琴家肖邦（蕭邦）過橋，話上帝問肖邦能否彈出像中國股民對A股那般憂傷嘅歌，肖邦搖頭，上帝開估話，你細佬肖鋼咪得囉！肖邦繼續搖頭：「我倆不一樣，我有譜，他沒譜！」
對於阿爺上周五忽然叫肖鋼做埋中證監扶貧開發工作領導小組嘅組長，有網民就開估，話正因為肖鋼令全國股民變貧，解鈴還需繫鈴人咁話。
學生都加入戰團，「強烈要求期末考試加入熔斷機制」，建議考試題目有5%考生唔識做，就暫停1個鐘一齊冷靜思考，重新開考後有7%考生唔識做，直情熔斷咗個考試，Yeah!
購物狂亦抽水，指支付寶應引入消費與家庭收入掛鈎嘅熔斷機制，「以應對不期而至的消費欲爆發，維護家庭幸福」。
中證監主席係三煞位
其實中證監主席從來都係三煞位，《人民日報》仲形容為「坐火山口」。上任主席郭樹清就可能因為著手處理內幕交易、收緊上市標準等等，踩中唔少既得利益者條尾，任期唔夠一年半，2013年3月忽然被調去山東做副省長。
肖鋼一接任，就爆出「光大烏龍盤事件」，到舊年中股災、新股註冊制、以至熔斷機制，件件都係燙手山芋。難怪肖鋼頭痕到，都冇時間亦冇心機染黑頭髮，好讓呢把銀髮成為佢喺中證監嘅印記。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com