油會便宜過水?
2016/01/13 09:06:02
網誌分類: 經濟
阿爺力撐人民幣，離岸人民幣隔夜拆息扯上163厘(日息0.45%)，內地股市回穩，上證指昨日收市微升0.2%至3022點。港股無阿爺照住，繼續腳軟，恆指續跌0.9%。外圍方面，人民幣回穩，加上油價早段反彈，歐美股市反彈
。德國及法國股市齊升超過1.5%，美股表現亦唔錯，杜指升118點，收報16516點，升幅0.8%；標普500指數升15點，收報1939點，升幅0.8%。叫做先定一定。
人民幣同中國股市回穩，但並無「鑊氣」，市場焦點又走番去國際油價。昨日朝早，有消息傳出多個石油出輸出組織（OPEC）成員國要求召開緊急會議，討論產量方面的策略，又話最大產油國沙特表示，願意支持召開緊急會議。市場的解讀係既然講到要召開緊急會議，相信係討論油價近期急跌的問題，畢竟，產油國的財政亦因為油價急瀉受到重創。所以消息甫出街，紐約油價隨即急彈1%至每桶32.19美元。
但開心無幾耐，路透社援引OPEC非海灣國家成員代表話，OPEC成員國只係就油價進行常規溝通，唔係召開緊急會議。消息好似一盤冷水照頭淋，油價即時滑水，至中午時分，紐約油價更一度失守30美元大關，低見29.93美元，到下午才反彈上接近31美元水平。
油價跌跌不休，新年至今不足10個交易日，油價就下跌了超過20%，跌破30美元的12年以來低位。在市場預期油價將會繼續下跌的大環境下，睇嚟油價的跌勢遠未停止。從美國商品期貨交易委員會昨日公佈的資料顯示，愈來愈多人在沽空原油，截至1月5日的一周內，紐約期油淨好倉合約減少了23863張至76934張，跌幅24%，創了2010年7月以來最低位。好倉減少了2.5%，降至去年7月以來最低水平，而淡倉合約增加了11%。
油價近期急速下跌，相信係與投行近期紛紛加大看淡原油的力度有關。繼高盛此前預計紐約原油會跌至20美元之後，連此前預期油價今年會反彈上49美元的摩根士丹利，上日亦出報告話，隨著人民幣貶值不止，油價跌至20美元的是有可能的。巴克萊大宗商品分析師Miswin Mahesh表示，去年中國石油需求增長了5%，但去年11月份的石油需求量卻較上年同期縮減2%，係2014年7月以來首次出現下降。這意味著，中國經濟的疲態終於在石油資料上反映出來。
中國係美國以外最大的石油消費國，經濟唔得，用油的增速減慢，而美國更由最大的石油進口國變成出口國，需求下降程度，可想而知，而石油出產國不但止唔減產，仲瘋狂地泵油，令到供求不成比例。市場依家已開始擔心油價「跌跌不休」，未見底線。目前對油價最惡劣的預期的來自渣打分析師，他們預計油價或會降至每桶10美元，仲平過礦泉水？
不過困擾港股最大問題仍是人仔匯價，而家在大戰中，見到百幾二百厘的拆息，老外不敢掂港股。有人問我恒指8.7倍市盈率好唔好買，我話係當頭跌，即使係長線投資者，買要預佢再跌，可能今年真係要見18000點，所以長線買家跌穿19000點先入手個心會安啲，對長線投資者來說，今次錯過了仲有下一轉。好多人口話唔怕跌，一跌就心驚不停問，好難在跌市買股，即使明知三年內恒指好有機見番25000點，都好難叫佢在20000點買。
陸羽仁
回應(9) 我想回應
陸羽仁 BLOG 舊文
來源 source: http://blogcity.me