笑到最後：
買樓唔會令你變黃成智
鄰居渾水老弟喺另一份報章《AM730》專欄撰文話，後生仔唔好亂咁買樓，大致上話黃成智因為全職從政收入不穩，96年高位又買咗樓，覺得買樓會導致臨老扮超人。高明覺得渾水老弟講法邏輯上有問題。
因為任何大額開支，例如買法拉利、買股票，甚至好似許仕仁咁買歌劇豪
使成癮，只要找唔起條數，最後都會出現財政問題，同買樓無關。只係因為一般買樓要造按揭分廿幾三十年還，而其他消費品直覺覺得係一炮過，所以唔會孭債。
實際上，好多嘢都可以令你孭上一條長債，例如媾女、結𥲑、生仔，唔通因為驚孭條債，而唔媾女？
一般人可能得，但渾水老弟貴為最年輕上市公司執董，冇十打八打女傍身襯唔起佢身份，而偽毒嘅佢亦都好似真係有，此乃後話。
反而，唔好以為唔買樓就會好free冇負擔，因為要租樓，每個月經常性開支冇少過。租樓嘅錢，一定冇回頭，係必輸嘅錢；供樓嘅錢，只要樓價唔跌穿買入價，等同幫你儲錢。
而且租約一年生一年死，加租、續約，完全冇主動權，有租過樓嘅都知，一年唔加，兩年約滿一定加租，甚至唔傾直接趕你走，每到約滿前提心吊膽業主來電。曹Sir遺訓叫後生仔「目光遠大」，租樓每年幾就逼你將目光放喺搬屋上面，試問又點專心事業？
地運差難有創業機會
就當業主真係咁好人，租10年樓畀你又唔加租，每個月租金一萬蚊，10年就係120萬蚊；同一筆錢拎去供樓，即使摸咗頂，唔通10年捱唔到一個樓市上升周期？坦白講，如果香港地運差到樓市寸草不生，創業機會都唔會存在。
可能又有人會覺得從政會帶來收入不穩定，所以唔好從政。其實都冇乜關係，因為就算有穩定收入，例如許仕仁做公務員，仲係首任強迫金行政總裁，教香港人點儲錢。
許仕仁自己有穩定收入、有大額長俸，而許仕仁住間樓連租都唔使交，到頭來咪又係破產收場。
返轉頭講黃成智，佢喺96年買樓上車，老實講，樓價2011年已重返97價，乜都返曬嚟，之後幾年想落車大把位任你沽，佢去年亦稱沽咗樓供仔去美國讀書。
一層樓供咗廿年，當攤長做30年按揭，差10年供滿，本來都幾輕鬆，太太有病要洗腎，多一筆開支係不幸，但客觀上咁睇，佢要臨老扮超人，最大原因可能係供個仔去美國，同佢有冇買樓真係冇乜關係。
香港有一半家庭有自置物業，又唔見香港有一半人要扮超人？黃成智搞成今日咁，係黃成智自己嘅問題，與其他人和事無尤。
高明
即上偶像派財演高明專頁：
https://www.facebook.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com