金融High Tea 2013年12月11日
潛行凶間
2013年12月11日
兩電宣佈明年電費調整，中電加幅3.9%，幅度為近幾年最低，港燈最犀利，維持價錢不變，仲預告咗喺未來五年電費唔會加。有人話，喺百物騰貴下，電力公司的決定，算唔算送咗份聖誕禮物畀市民呢？
電費經過去兩年勁升後，今年加幅大減，主要原因是煤價大跌。現時燃煤仍係本地最主要的發電方式，煤價今年大跌近三成，足以抵銷改用天然氣價格的成本升幅。另一個加幅減慢的原因，是兩電未來投資減少。電力公司收益同回報掛鈎，投資增加愈多，加價壓力愈大，由於政府大力限制新投資，加價壓力自然減低。
兩電股東要睇開啲
對電力公司嚟講，燃料價格上升帶動電價，只係羊毛出在羊身上，對公司利潤無直接影響。真正入肉嘅係，投資增長有幾多，假如投資增長受限制，電力公司盈利都好難有增長。港燈今年唔加基本電費，仲預告埋未來幾年都維持差不多水平，正路嚟講，本地的業務增長極有機會放緩，作為港燈母公司的電能實業(006) 能否追得番條數，就要睇海外業務表現，有中環茶友話，港燈步入低增長期，唔怪得先前有消息，話電能考慮分拆香港業務上市。中電(002) 情況好過港燈啲啲，未來幾年仍有一定投資。早前中電聯同南方電網向美國股東增持發電資產股權，美資願意出貨，好大原因係想套現低增長業務，改投其他高回本生意。正如中環茶友先前分析，大氣候對本地公用事業不太有利。對兩電股東嚟講，唯有睇開啲，安慰自己加價加得少，未來傾利潤監管計劃會無咁大壓力囉！
兩電股價有乜反應，今日會有分曉，至於大市昨日恒指反覆偏軟，全日跌67點，剛好抹去了上日升幅。大市主要受中資金融股拖累，內銀股全部向下。其中較細規模銀行跌幅較大。農行(1288) 、中信行(998) 及重農行(3618) 都跌超過1%，印證咗陸羽仁話內銀股宜炒不宜揸的道理！市場較關注的是上周五上市剛好「滿月」的重慶銀行(1963) 。重慶銀行藉住內地銀行來港上市三年無發市同首家城商行的威勢，招股勢態都幾「墟冚」。由路演至成功上市，都唔使一個月，更獲得7.8倍超額認購。可惜，重慶銀行卻有頭威，無尾陣。上市後股價表現就真係有負眾望啦，上市當日最高見過6.03元，但收市5.99元，已經跌破6元的招股價，之後一路「潛行」，擔心股價仍有凶險。
二線內銀通街「平貨」
重慶銀行股價唔掂，有業內人士解釋，近年內銀盈利增速放緩，以及潛在的地方融資平台貸款風險，令股價受壓。以重慶銀行為例，2011年及2012年，地方融資平台貸款都係112億元，至2013年6月底，已經有107億元。另一家剛上市的徽商銀行(3698) ，昨收3.54元，較招股價僅高0.01元。強如工行(1398) 、建行(939) ，這幾年股價都「吊緊鹽水」，再睇睇重農行的表現，三年前上市招股價5.25元，昨收3.83元，已經大平賣咗27%！
不過，一雞死、一雞鳴，今個星期五，又有內地銀行來港公開招股啦。闖關嘅係光大銀行(6818) ，佢已經係第三度試閘。以招股價3.83至4.27元計，最高集額達216億元，有望超越信達(1359) ，成今年新股集資王。
陸羽仁
金融High Tea 舊文