異動空間：芯片股滄海遺珠 - 魏力
個市悶到昏迷，蘋果及fb季績好過預期，科技股連挾倉都冇力，瑞聲(2018)仲要高開倒插，真無癮！頁岩氣股彈兩日又散，輪到手機及乳業股上位，但市底太弱，即使閣下勇敢衝入場，跟進者亦寥寥可數。挾兩三日，炒家又鳴金收兵換馬，走唔切又中伏，走得切都係賺茶錢。
炒開股票嘅人，都會對曾經贏過錢的愛股特別有感情，魏力2006年投身股海，最初炒來炒去就係聯想(992)，兩個幾買，升一成就沽，跌咗又買番，幾個回合後賺了點錢，自然與聯想戀愛了。2007年直通車炒爆後，聯想由9個幾碌落6蚊，魏力又動凡心，諗住「寵幸」多聯想一鑊，但戀愛是雙方的，戀上一隻股票，永遠是單向的，單戀的下場是悲慘的──在一個月內聯想由6蚊直插落4蚊，無水花，碩士學費幾乎泡湯，幸好上天眷顧，幾個月後反彈到5蚊走咗，保住學費，也上了寶貴的一課。
市傳中央將斥資1,200億元，成立芯片業扶持基金，受惠股可吼上海復旦(1385)，主攻金融IC卡、公交卡、市民卡，並為智能電錶及物流網提供安全與識別芯片，用途甚廣。走勢上，該股於7.8元橫行整固後，昨破關而上，成交配合增加，短線反彈目標9.5元。
魏力
http://www.facebook.com/2012jason
上一則: 何車500：瑞年PE僅 2.9倍 - 何車
下一則: 青心直說：點玩A股至啱 - 胡孟青
異動空間 - 魏力 舊文