魚樂無窮：搵下隻Webb發難股 - 唐牛
■David Webb持有的亞倫國際具派特別息潛力，手頭淨現金及各類存款高達3.3億銀。資料圖片
昨日大市表現，用一個字可以形容︰悶！究竟悶成點？唐牛朝早望咗個市兩眼，已經唔太開胃，跟手落街跑步做運動，一個鐘後返屋企，平日用嚟同戰友交流嘅facebook同skype，竟然一個message都冇留低！問十個有九個都係齋睇冇trade，噚日全日成交仲有500億銀，港交所(388)應該要還神。
大市恐悶到世界盃後
科網股一如預期得一日貨仔，文化中國(1060)及中信21世紀(241)雙雙下挫半成，炒股如西京國際(2339)、寰宇國際(1046)亦極速回塘，短癮到暈。破位即追策略現階段明顯不可行，鬥氣嘅話只會惹來一身蟹貨。樂觀啲睇，爛炒如唐牛都咁灰，大市應該悶多一陣就會突破。幾時有突破？五窮六絕月同埋世界盃之後，應該會係一個幾好嘅timing。
股壇長毛David Webb乃軟件商科聯系統(046)第四大股東，昨日佢向公司董事會發公開信，直斥公司資產負債表臃腫，以及亂炒股票招致損手，故強烈要求公司派特別息每股0.84元，相當於31厘息！難怪封信一出，科聯即瘋狂炒上。
翻查Webb嘅持股，亞倫國際(684)亦極具派特別息嘅潛力。截至去年9月底止，扣除長短債後，手頭淨現金及各類存款高達3.3億銀，相當於近五成市值，其中存款更達2.3億銀，資金閒置情況嚴重，Webb隨時又會發難，要求公司回饋股東。不過亞倫交投較疏，戰友入市要有坐貨心理準備。
唐牛
上一則: 炒友Blog：國美營造圓底睇2元 - 邱古奇
下一則: 股場放大鏡：福壽園動態積極可諗 - 歐陽風
魚樂無窮 - 唐牛 舊文