一周三件：綜合環保值博 - 錢雋
■鄭志明任主席的綜合環保，筆者看好，股價上望0.86元。資料圖片
周二主打重慶機電(2722)，到噚日最高升咗近10%，集團剛啱講話阿媽會注優質資產，在城鎮化政策下，舊經濟股一樣掂檔。今日整件受惠舊經濟環保、新經濟瘋狂網購熱嘅綜合環保(923)予讀者參考。大孖沙新世界系第二梯隊鄭志明擔正綜合環保主席，現價貼住上市低位，博翻身，絕對有得諗。
有新世界做後盾
綜合環保前身福和，除咗做廢紙回收，兼原先喺祖國經營再造紙業務。2011年，就因為祖國附屬賬問題而要停牌，兼喺翌年狠撇17億銀，今年1月23日先至搞掂兼復牌。復牌一日，綜合環保嘅股價一度狂插74%，成交接近4億股，貼近街貨權益40%，唔少投降盤，相信亦唔少強手接貨，應該係一插到底。又綜合環保呢個殘價(0.59元)，相對2010年已大跌咗84%，PB得0.9倍，加埋有高達4.3億銀淨現金墊底。而更吸引係，大孖沙彤叔乖孫鄭志明，坐正集團掌舵。三年前報載，鄭公子親身考察重慶惡臭沖天嘅汙水廠。睇到佢係務實型，兼有環保底子。鄭公子喺首次擔正香江上市公司掌舵，信佢會瞓身搞好綜合環保。
綜合環保有新世界呢個超強back up，新世界系內，亦冇環保主打旗艦，綜合環保又幾啱嘴型。又2010年及2011年，彤叔周大福入股綜合環保20.3%，每股成本價全部2.4元，家陣賬面唔見近9億銀。回說本業，上年祖國快遞高達91.9億件，大增62%。網購大趨勢，快遞用包裹材料刺激平價再造紙，及再上家廢紙回收勁大需求，綜合環保有運行，本年度turnaround。呢轉先博翻半番到0.86元，PB 1.4倍，仲未上到綜合環保上市以嚟嘅平均兩倍PB(最高PB曾見近3倍)。
博綜合環保俾鄭公子湊大，上番周大福入股價2.4元，現價要大升過3倍。
錢雋
細價股專家
本欄逢周二、三、五刊出
上一則: 投資學堂：要提防假突破 - 譚紹興
下一則: 滙海探戈：奶粉冧價紐元要唞氣 - 奇兵
~TITLE_S~一周兩件 - 錢雋 2014年4月4日 舊文