中環在線：「金融界少林寺」45周年酒會新證新舊老闆密斟 - 李華華
■李成煌(左)同馮永祥都屬低調之人，適逢新證周年誌慶才鮮有公開露面。黃偉傑攝
由馮景禧創辦、有「金融界少林寺」之稱嘅新鴻基證券，即新鴻基公司(086)慶祝成立45周年。馮景禧兒子馮永祥(Tony)1996年將新鴻基賣畀聯合集團李明治家族，噚晚罕有現身慶祝酒會，仲同李明治兒子、新鴻基主席李成煌密斟10分鐘。
馮永祥有「股壇壞孩子」之稱，曾經提出以一仙收購中巴(026，現為中華汽車)，近年相當低調，又走咗去澳洲投資賭場。
噚晚難得見佢現身，傍晚6點半就一早到場，佢跟李成煌好似老友聚頭咁，不停咬耳仔，細細聲好認真咁密斟10分鐘；之後佢再逗留10分鐘左右就閃了。
■現場有不少名人捧場，包括(右起)梁伯韜、梁永祥和劉怡翔等。
■李澤楷老友鍾楚義(左)與友人密斟。
■現場侍應著上交易所出市代表嘅紅背心，仲印有新證股票編號86，幾有心思。
馮永祥換名片感猶豫
傳媒上前想跟馮永祥換名片，佢最初都好猶豫，最後畀咗張名銜係「禹銘物業管理有限公司主席」嘅名片。禹銘(666，現稱新工投資)係佢同拍檔馮耀輝創立，早幾年易手，原來佢保留番個公司名自用。
新鴻基𠵱家嘅話事人李成煌就更加低調，基本上冇乜公開露面。佢年約40歲，除咗新鴻基，仲有其他生意，喺馬來西亞同澳洲都有搞地產。佢話，平時雖然要周圍飛，但多數時間都留喺香港。李成煌忙住招呼賓客，新鴻基行政總裁梁永祥亦都滿場飛。
賓客包括財庫局副局長劉怡翔、金融服務界立法會議員張華峰、資本策略(497)主席鍾楚義，當然唔少得「紅籌之父」梁伯韜，佢旗下私募基金CVC喺2010年入股新鴻基接近兩成，梁伯韜現任新鴻基非執董。
可惜，七十年代曾經效力新證嘅港交所(388)前主席夏佳理與前行政總裁周文耀有事未能捧場，否則更加星光熠熠。
李華華
mailto:LiWaWa@AppleDaily.com
上一則: 恒生銷售保柏醫保
下一則: 中環在線：黃建業斥3,790萬增持美聯反擊 - 李華華
中環在線 - 李華華 舊文