陸羽仁 BLOG 2014年7月11日
葡國危機
2014/7/11 上午 10:00:34
網誌分類: 經濟
久違了一段日子的歐洲債務危機，好有可能又會大家見面啦。葡萄牙最大的銀行集團出現違約事件，令到投資者對脆弱的歐洲銀行業緊張萬分。
葡萄牙最大銀行聖靈銀行(Banco Espirito Santo SA)的母公司聖靈金融集團(Espirito Santo Financial Group) ，昨日稱「出現了持續的重大困難」，暫停其股票與債券的交易。聖靈金融集團勁插16%，聖靈銀行股價亦大跌近15%。葡萄牙債券市場今天也損失慘重，國債價格持續下跌。10年期國債收益率上漲0.2厘，至3.98厘，創下5月中旬以來新高。
葡萄牙當局要求下，聖靈銀行及控股公司聖靈集團昨日中段暫交易，停牌前聖靈銀行跌17.2%，本周累計跌32.2%，聖靈集團跌8.9%，本周累跌24.5%。咁大間銀行市值一周內損失三分之一，真係輸死人。
爆大鑊源自《華爾街日報》去年底的一篇報道，聖靈集團的融資方法非常可疑，報道令葡國中央銀行調查，後來在今年5月揭發聖靈集團賬目有問題，財政情況極其嚴峻，只是把問題掩飾而矣。消息曝光，聖靈集團開始週轉不靈，本星開始未能償還短期票據飲欠款，昨日更宣佈暫停股份和債券交易，市場大驚失色。雖然葡萄牙央行昨日話聖靈銀行受當局保護，但市場非常憂慮，觸發股價大跌停牌。
兩年前出現歐債危機後，現時好像雨過天晴，歐豬國債券反彈到好高水平。但聖靈銀行係葡萄牙最大上市銀行，原來有咁大問題，令人懷疑歐債問題根本未醫好，只是踢咗落地氈底。
再加上意大利5月工業生産意外下跌1.2%，係2012年11月以來最大跌幅。法國工業生産意外下降1.7%，為18個月以來的最大跌幅。壞消息齊出，仲唔嚇到投資者腳軟？意大利股市昨日跌1.9%，法國及德國跌超過1.3%。
面對歐洲金融危機風險，美股都好難有運行。不過，美國就業市場有好消息頂住，最近一周的首次失業金人數降至30.4萬人，低過預期同前值的31.5萬。美股朝早大跌後逐步收窄跌幅，三大指數收市跌少過0.5%。杜指收市跌70點，報16915點；標普500指數跌8點至1965點%；納指跌23點，收報4396點。美股仲係好強，一跌即彈。避險情緒升溫，黃金漲1.1%至每安士1339美元。要小心歐洲銀行的局勢。
陸羽仁
回應(4) 我想回應
陸羽仁 BLOG 舊文