中環在線 - 李華華 2015年8月4日
中環在線：羅康瑞連失兩猛將
瑞房掌櫃返港創業
■羅康瑞左右手都辭職，佢又要煩請人。 資料圖片
「上海姑爺」羅康瑞旗下瑞安房地產（272），近期頻頻有高層變動，黃勤道今年6月話要提早退休，辭任董事總經理（MD），財務總裁尹焰強（Daniel）上星期亦請辭，計劃由上海返港創業，希望事業更上一層樓。
同好友開財顧公司
聽Daniel所講，佢已經滿腹大計，準備舉家由上海回港，創業打拼，同好友合夥開設企業融資與財務顧問公司，咁咪即係幫客戶搞IPO（招股上市）、併購同提供財顧服務？可惜Daniel大賣關子，話公司仍在籌組階段，稍後先講。
咁又啱喎，雖然Daniel上星期辭職，即時生效，但要等到今年10月1日先係正式離開瑞房，道理上真係要稍後先可以講新動向。56歲嘅Daniel強調，佢𠵱家係懷著興奮心情，期待踏入事業新階梯。
講起Daniel，不得不提佢與死神擦身而過嘅經歷。話說2004年聖誕，佢去泰國布吉寇立度假，遇上南亞海嘯，因酒店安排出錯，佢嘅房間由原來入住嘅2樓，改為3樓，因而撿回一命！當日巨浪滔天湧至，千鈞一髮之際，佢仲跟另一位遊客，合力救起一名幾乎被暴潮沖走嘅外籍房客㖭。
Daniel走埋，瑞房暫時得番羅康瑞，同埋66歲嘅老臣子黃月良兩位執行董事，上海姑爺呢排應該忙住周圍搵人。
不過佢應該都習慣搵人㗎喇，事關羅康瑞2011年話唔做行政總裁，搵來1986年就加入瑞安集團嘅李進港做行政總裁，兼且負責推行3年計劃，不過佢應該因為交唔到數，舊年初辭職走人。
羅康瑞跟手搵來1979年就加入瑞安集團嘅黃勤道做瑞房MD，黃勤道唔做，佢再搵或者自己再擔大旗都得。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文