魚樂無窮 - 唐牛 2015年8月4日
魚樂無窮：兩招傍身抗淡市
■炒股唔怕大升唔怕大跌，最怕陰乾！ 李潤芳攝
炒股唔怕大升唔怕大跌，最怕陰乾！恒指H指齊齊1%，話多唔多話少唔少，望真啲，原來H指跌穿咗7月8日股災收市價，即係話你好叻好大膽喺嗰日撈貨，如果唔食糊嘅話，一個月後嘅今日竟然要嘔凸，係咪唔講唔覺呢？呢啲就係陰乾嘅可怕之處。
究竟大師兄幾時先返嚟？唔好意思，今年好大機會都見唔到佢。點解咁肯定嚟緊幾個月冇運行？前輩教落，股市每年只得一兩次搵錢機會，今年嚴格嚟講出現咗一次半︰第一次，4月開始嘅大時代；另外半次，就係文初提到嘅股災日，因為機會一閃即逝，絕非尋常之士能夠掌握，所以只計半次。
既然今年quota用曬，想再開party要等奇蹟，由客觀事實睇，機會微乎其微。「唔係喎，內地經濟咁差，阿爺好快又放水啦！」乜你仲信放水可以谷起A股？內地股市規則蕩然無存，幾十個對沖基金戶口被凍結三個月，搞到全世界都唔敢落場，成交已經落番一萬億樓下，總言之，中央一日唔退市，一日都難有運行。港股寄人籬下，更加唔使諗啦。
呢幾個月係炒股特訓期，首先要學會忍手，大時代見破位就衝可贏爆廠，今時今日亂衝只會輸甩褲。其次，要學識揀股，不外乎由業績出發，再睇估值、派息，花時兼費神。學識以上兩招，未必會贏大錢，但肯定可以幫你保住利潤。
唐牛
https://www.facebook.com/tongcow88
唐牛
魚樂無窮 - 唐牛 舊文