金融High Tea 2014年3月20日
大件唔代表抵食
2014年03月20日
指數上落唔大，市場焦點落喺內地房企傳要人行出手相救，由於消息被否認，內銀、內房股價齊齊受壓。講起內銀，陸羽仁早前同班富貴阿伯傾偈，大家講起內銀都頭擰擰，話內銀大件夾抵食，睇落平靚正，唔知點解買極都唔升？
富貴阿伯大把身家，老早唔使搵食，買股投資都唔係搏命嗰隻，主要係收息，兼有小小長線升值已經滿意，點知買咗內銀股，覺得佢哋有阿爺照住，又有咁好息口，無理由股價非但唔升，仲陰陰哋跌，最慘係覺得抵買，愈買愈多，變到成手都係。
舊經濟股好景不再
富貴阿伯買股唔大貪，點知唔貪都變貧，講出嚟真係有小小唔抵，點解出現咁情況？陸羽仁認為，主要係佢用咗舊思維去睇。係舊經濟年代，銀行係百業之母，無可能會唔掂，尤其好似香港，當年匯控(005) 、恒生(011) 呢啲大銀行，有買貴、無買錯，故此好多貪穩陣的投資者，都鍾情買銀行股，點知家銀行業變咗舊經濟股，時常被人狙擊。
無錯，內銀股係國企，有中央照唔會執笠，但中央家唔止照住內銀，仲「射」住佢哋𠻹。過去四大國有銀行壟斷咗大部份貸款市場，賺錢肥到襪都着唔到，但佢哋只係一味放款畀自己友，搞到民企怨聲四起之餘，仲被視為阻住經濟進一步發展。由於家經濟已完成粗放式發展，唔再可以再靠中央大力投資推動，現屆政府提出要深化改革，矛頭之一就係「射」住國有銀行，又話要將利率市場化，變相壓低佢哋的利錢，搞到內銀周身唔自在，喺環境唔明朗下，股價咪愈買愈平，仲變成大大嚿的孱仔，一有風吹草動就頭暈身㷫腳仔軟軟，故此陸羽仁舊年就已經叫手頭若買重內銀股者，可以趁高減磅，可惜富貴阿伯當時無嚟中環搵我飲茶啦！
講開舊經濟股，政府昨日公佈能源政策，簡單嚟講就係增加使用低排放能源，代價唔使講梗係要貴啲成本，咁羊毛出喺邊個身上呢？最直接當然係消費者，但會唔會電力公司都要承擔部份呢？喺家社會樣樣講民意下，電力公司將來的准許利潤，仲可唔可以維持家咁高真係大有疑問，故此對於本地電力公司，前景挑戰認真嚴峻，過去發電同做銀行一樣，係用OPM(Other people"s money)嚟賺錢，領正牌印銀紙，家雖然生意都仲係幾好做，但肯定無以前咁發，由於股票價錢係反映盈利能力同前景，咁樣對股價自然唔會係好事囉。
財仔走人嚇散碧桂園
係內地浙江興潤置業資不抵債，市場擔心內房「爆煲」影響內銀下，港股全日好淡爭持，整日高低波幅僅129點，恒生指數收報21568點，跌14點或0.07%；國企指數收報9360點，升18點，成交金額641億元。昨日內房股表現參差，最吸引眼球係碧桂園(2007) 首席財務官伍綺琴辭任，自今年4月30日生效，「財仔」走人，搞到佢股價大跌12%。另外，建設銀行(939) 一度跌穿5元，創咗一年新低。股仔方面，好多當炒股都係上午有勢，下午就收斂，反映散戶係氣氛唔明朗下都不敢去得太勇。
收市後，騰訊(700) 公佈，去年第四季股東應佔盈利按季增加1%，遜於市場原預期。不過，市場更關注的可能係公司宣佈一股拆細為五股，拆細後每手買賣單位維持100股。仲有就係張志東基於私人理由辭任，將辭任執行董事及首席技術官。
陸羽仁
金融High Tea 舊文