中環在線：呂志和獎獲注資20億
首年關注世界糧食供應
■呂志和話用咗兩年時間嚟籌備呢個獎。
噚日肯定係一個好日子，事關有「東方諾貝爾獎」之稱嘅邵逸夫獎晚上頒發，銀娛（027）主席呂志和亦選擇喺呢日宣佈，正式成立「呂志和獎─—世界文明獎」，呂志和一次過將20億元資產注入獎項公司作為首
期資金，支持呂志和獎營運。
■陳家強擔任「呂志和獎」成立典禮嘅主禮嘉賓。 陳奕釗攝 
董事會星光熠熠
呂志和獎項公司嘅成立認真星光熠熠，董事會4名成員包括呂志和、前高官馬時亨、港大前校長徐立之同埋「公職王」鄭慕智。獎項理事會成員就包括前特首董建華同美國前國務卿賴斯。呂志和話，籌備呢個獎有兩年幾，為嘅係回報社會，獎勵喺促使世界資源可持續發展、促進世人福祉、倡導積極正面人生觀及提升正能量三方面嘅傑出人士。
具體嚟講，佢哋第一年會關注世界糧食供應、醫治或控制疫症、傳染病及慢性疾病，關注領域會年年唔同。
獎項推薦委員會成員劉遵義強調，提名人不限種族、宗教或國籍，甚至唔需要係學者或專業人士都可以被提名，係呢個獎與其他獎最大分別。
舉個例，一個普通人為禿山種滿樹，「可持續發展」又中、「提升正能量」又中，咁就符合提名資格嘞。咁唔知促進民主法治嘅年輕人，或者救古樹嘅樹醫生又可唔可以獲獎呢？
劉遵義又叫大家嘅「注意力唔好淨係集中喺獎金」，但呂志和一出手就注入20億資產做第一期資金，每個獎又2,000萬元咁大手筆，好難唔注意喎！
首屆獎項預計明年下半年就會頒發，大家不妨拭目以待有冇好似你同我咁嘅普通人攞獎嘞。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文