一周三件：津燃等湊大格
■中燃市值527億元，是津燃市值的33倍。圖為中國燃氣執行主席劉明輝。 資料圖片
天津津燃（1265）股價插到落5年底，連埋內資股計，總市值得16億元，係市值最細奀嘅燃氣股，貴為天津市燃氣上市平台，市值同身價一啲都唔匹配，又係等湊大。
津燃見2013年3月高位3
.54元後，家陣累跌75%，現價（0.87元）質到落2012年低位水平，總市值16億元，街貨市值更只得5億元。場內行家，中國燃氣（384），市值527億元，係津燃市值33倍，又潤燃（1193）市值473億元，就連中油燃氣（603）同中國油氣（702）市值都貼近30億元，津燃市值細奀到爆。
翻半番依然超值
今年頭，津燃對上控股加多咗「天津能源」，而津燃大股東權益，亦由原先揸內資股51.3%，提高到64.1%。天津系統中，津發（882）喺控股權理順之後，今年7月就公佈獲阿媽注醫藥瓣數。津燃呢嚇架構股權理順，有啲味道。
又津燃今年上半年成績單講明，會透過合併同收購擴張業務。而集團到今年6月尾淨現金1.73億港元，若果連埋擺喺流動資產嘅其他金融資產8.6億港元，已經足夠為津燃提供勁厚嘅銀彈優勢。
津燃喺呢個5年底，最新PB得0.79倍，比起2008年金融海嘯10月慘烈期0.94倍仲要低。上邊行家，中國燃氣3.1倍PB、潤燃2.75倍PB。津燃係天津市燃氣窗口，PB比起同級數行家，平咗一大截！
細細注煲津燃，等集團搞併購，或俾阿媽湊大，翻半番到1.3元計，市值都係得24億元，PB啱先1.1倍，比起同級燃氣股，仍然差天共地。
錢雋
細價股專家
本欄逢周一、三、五刊出
錢雋
一周三件 - 錢雋 舊文