異動空間：短線留意兩樣嘢
節日氣氛濃厚，中秋後過兩日又國慶，加上下周二（29日）期指結算，大戶散戶都傾向平倉減磅，成交縮至706億銀，下周應該都係靜，成交薄弱下不妨先忍手，以免市況太飄忽中伏。
短線個市留意兩樣嘢。德國車股爆大鑊，繼福士柴油車廢氣測試造假後，寶馬SUV又被驗出廢氣排放
量超標10倍，作為領先全球的汽車製造業強國，德國聲譽勢將受損。法國大行法興當然唔畀面，因福士造假事件，將整個德國汽車股的評級由「跑贏大市」降至「中性」，更呼籲投資者遠離德股。汽車股佔德國DAX指數的比重達17%，不僅福士，寶馬及戴姆勒亦同屬DAX指數成份股，歐元區大哥德國唔掂，對疲弱的歐洲經濟絕非好事。
另一方面，雖美國9月唔加息，但彭博調查指12月加息機會達六成，美滙指數急升，新興市場走資潮持續。聯儲局驚加息拖冧全球經濟，但唔加息又隊冧個市，經濟都唔好得去邊，完全是惡性循環，難怪債王格羅斯都催儲局加息唔該爽手啲！個別股方面，聯塑（2128）逆市顯強勢，連續13日企於10日線之上，業績佳估值亦不貴，先列入觀察名單。
魏力
http://www.facebook.com/2012jason
魏力
異動空間 - 魏力 舊文