魚樂無窮 - 唐牛 2015年9月25日
魚樂無窮：誰是下一隻渣打？
■港股昨日再跌206點。 李潤芳攝
港股再跌206點，執筆之時夜期失守21000大關，適逢10月乃傳統股災月，後市再試低位似乎在所難免。同股壇老前輩傾開，佢話而家股市冇得玩，一來老散輸得七七八八，承接力極弱，二來莊家冇水，連魚毛都唔放過，惡性循環之下，真係前所未有咁難玩。
以為只有莊家股唔掂？咁就大錯特錯！望一望52周新低股份，銀娛（027）、澳博（880）、美高梅（2282），全部大大隻濠賭股，一心諗住撈底博反彈嘅，結果越撈越低。「澳門已經衰無可衰啦，嚟緊基數實低，業績應該會反彈。」無錯，但只啱一半，唔好忘記，路氹新項目一浪接一浪，未來供應多到爆燈，成本上升人流卻有減無增，條數好難計得掂，加上濠賭股處於大浪時，明顯有炒憧憬成份，如今重返人間，績差+de-rating兩面夾擊，摸到底係好彩，要收復失地？難矣！
另一邊廂，中國經濟數據沒有最差、只有更差，加上儲局加息拖字訣，新興市場貨幣跌到一仆一碌，泰銖6年低，馬幣及印尼盾更是97金融風暴以來最弱，主打相關市場嘅渣打（2888）失守80元大關，變得理所當然。同樣主打新興市場嘅友邦（1299），業績雖勁卻以美元結算，蝕滙水都蝕到喊，近日股價明顯轉弱，40元大關相信久守必失。
唐牛
https://www.facebook.com/tongcow88
唐牛
魚樂無窮 - 唐牛 舊文