金融High Tea 2015年9月25日
好股未算平
2015年09月25日
內地經濟成為全球股市唱淡嘅理由，加上港股淡倉仲未清，恒指上日跌完之後，昨日再跌兩百點，國指連跌四日，學習大大話齋，依家中港股市係自我修復，意思係話浮浮沉沉繼續去搵平衡點。
下周期指及季度結，大市喺缺乏買意下，恒生指數收造21095
點，再跌206點；國企指數收報9469點，跌100點，成交706億元。如果留意呢兩日牛熊證資金流，散戶都係傾向博反彈，噚日即使超過80隻牛證回收，仍有散戶死心不息，20500點至21000點回收的牛證街貨有增無減。但大戶就淡少少，價外認購期權、例如1000點價外，比同樣價外的認沽期權，認購的期權金便宜幾十點，開價反映大戶傾向，或許是買認沽期權作對沖的盤路亦較多。
藍籌股騰訊(700) 主席馬化騰九個月內三度減持，收報130.7元，微跌0.2%。馬化騰過去不時減持公司股份，有人話佢年年收獎勵認股，有價就唔怕賣，今次習大大去美國，有傳中國擬放開對部份美國科技巨企來華的限制，不過最後時間太趕，來不及達成協議，若然將來成事對內地科網公司未必係好事，馬化騰沽定貨就更加唔奇啦。
長建傳投葡國電網
另外外電昨日報道，長江基建(1038) 有份競投葡萄牙風電網Iberwind，長建對消息不予置評。Iberwind在葡萄牙有31台風電機組，估值15億至20億歐羅。由於有多間公司競投，最後不知鹿死誰手。
長和喺海外投資近日惹起撤資爭議，不過有中環茶友話中國的中國國家電網在2012年亦都入股葡國國家能源網公司25%股權，動用32億元人民幣去投資，照計長建今次就算有競投，都唔應該咁大爭議啩。
新世界集團(017) 公佈截至6月底止全年業績，盈利191.12億元，同比升96.5%，每股盈利2.17元。期內收入552.45億元，派末期息每股30仙。期內香港物業發展收入連同合作項目應佔收益為103.89億元，分部業績為32.95億元，分別按年上升8.6%及58.5%。今個財政年度原訂之120億元香港的應佔物業合同銷售目標，達172億元的水平，賣樓大超標。新世界逆市升0.9%，報7.82元。
新世界呢兩年投地進取，由於樓市繼續高位運行，所以盈利增長靚仔。睇數字加埋佢有幾件中環、尖沙咀大型收租物業，真係大件夾抵食，但落唔落疊買佢，就好睇對香港樓市點市前景有無百分百信心啦。
恒指插到低點，有子彈在手的中環茶友，又想低吸博吓反彈，但問題依然一個，就係無乜股好揀，好似之前提過的巴士股載通(062) ，跌來跌去都仲係20元樓上。
想買好股要有耐性
茶友話，平股難有好、好股難有平，佢另一隻心水股華潤創業(291) ，呢排因為跨國啤酒業併購，股價好硬淨。華創本來係綜合企業，去年出售資產俾阿媽，集中做啤酒業務，套番的兩百幾億資金大派俾股東，扣除派息除淨，股價幾乎無跌過，變相跑贏大市幾千點，茶友喺佢除淨前已心思思想郁手，可惜一直無機會，令佢有好股難有平之歎。
港股跌到兩萬一千點水平，講真唔係貴，但你話係咪好平，又真係唔見得。從優質股票仲未係好平，可見到資金仲未真正全面撤離。華創現時營運雪花啤酒，係市場佔有率最大的經營者，市值330億元，另一對手青島啤市值229億元。雪花啤酒銷售高過青啤，但邊際利潤無咁好，未來挑戰係點樣可以推高產品檔次，又或者整體提高邊際利潤。
賣啤酒雖然利錢薄，但屬於現金流好強勁的生意，被視為穩健對象，加上巨企不斷併購，令呢類股份估值高企。如果要買一定要等到個市跌到亂籠，先有機會執到平嘢，否則只能耐心等候，唔可以心急跟消息炒作。
陸羽仁
金融High Tea 舊文