中環迷你裙：馬化騰最令人羨慕
■馬化騰近日減持騰訊股票，套現32億元。 資料圖片
大陸班富豪回歸後成群結隊移民來港，已有張香港身份證，起初他們貪配套夠完善、醫療系統信得過，家陣仲多咗個優點：買賣夠自由。A股多番折騰後，響應李克強號召回流A股上市的老闆家陣進退維谷，唔上市
，隨時冠上過橋抽板之名，唔幫手搞活A股；上市後，冇指示唔准沽貨，高價沽香港叫「靚沽」，喺大陸叫做「違規減持」。
股災過後，有個姓馬是最為富豪羨慕，唔係馬雲，人家在美國被集體訴訟搞到人仰馬翻，他們羨慕的是騰訊（700）主席馬化騰，人家名正言順在市場減持股票，套現32億元，Sam暫未見到有報紙標題寫住「別讓馬化騰跑了」，本港證監會亦都沒有就馬氏「巨額減持」開file調查，香港冇維權，只係得一個David Webb，幾咁和平。馬化騰今次減持的股數，是4月那次一倍有多，減持價仲要低過上次18%，馬化騰呢種級數，唔會等個幾十億元開飯，冒險喺跟習總訪美期間沽貨，第一，短期大市危矣，第二，儲定彈藥候低再掃過。儲局唔加息，畀資金多兩個月時間從新興市場流走，新興貨幣災難性貶值重現，德國汽車業醜聞不斷，外圍弱過藥煲，最攞命是下周A股交易日同港股分開曬，離場過中秋最合適了。
Samantha
https://www.facebook.com/stocksamantha
本欄逢周三、五刊出
Samantha
中環迷你裙 - Samantha 舊文