中環在線：重組關鍵時刻 提和黃小股東出席
投票逼近 超人好緊張
■李嘉誠想提醒小股東，到時記得去投票。
「超人」李嘉誠旗下長和（001）與和黃（013）嘅世紀重組，下星期一就進入重要時刻，事關和黃小股東將會投票決定係咪通過呢單大刁。超人應該都幾緊張，希望爭取多啲小股東到場投票，噚日
罕有咁喺個別報章登廣告，提醒小股東下午2點去紅磡海逸君綽酒店開會，仲寫清楚穿梭巴士嘅開車時間，怕大家遲到！
■和黃罕有咁登報提示開會時間，好貼心喎。 持股52% 李嘉誠冇份投票
長和系上市公司多數喺海逸君綽舉行股東會，超人可能知道呢間酒店有些少吊腳，實物股東以往除咗收到年報與股東會通知書，仲有一張穿梭巴士服務時間表連地圖，方便小股東去開會。但講到將呢張時間表登報就真係好少見，明顯係超人想提醒小股東到時去投票。
超人點解咁緊張？事關成單重組成唔成功，主要就睇和黃小股東制唔制。今年2月底長實開股東會就重組第一步投票，嗰次超人都可以投票，因而順利以99.76%通過遷冊並改名為長和。
下周一和黃股東會就規定只得獨立股東可以投票，持股52%嘅超人冇份。而要通過呢單刁，就需要超過75%獨立股東贊成，同時少於10%獨立股東反對先掂。既然要靠小股東，超人當然希望一票都不能少，盡量爭取多啲小股東到場投票，增添勝算。咁就未必好似超人之前所講，唔過就當無事發生過。
中央證券登記董事總經理鍾絳虹透露，和黃每年一度舉行嘅周年股東會，以往通常有1,000名小股東出席，佢唔敢估計下周一有幾多小股東現身，只係話打個7折都有700人。
和黃長和 股價拍住拖升
和黃（013）股東贊唔贊成呢單世紀重組，其中一個考慮因素，就係滿唔滿意0.684呢個換股比例。
根據建議，長和（001）股東可以一股換一股重組後嘅長和，和黃只係一股換0.684股。呢個換股比例基本上係用和黃除長和股價。
有趣嘅係，超人今年1月9日宣佈重組後，長和與和黃嘅股價竟然可以維持同步上升，冇話一隻升多啲。即使過去一星期，大量資金湧入港股，港股喪升，兩隻股嘅累計升幅都係大約三成，和黃噚日收112.9元，長和收165.1元，除開都係0.684，認真厲害。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文