魚樂無窮：百奧炒作基因集一身
■戰友日日等大跌撈貨，但傳統智慧告訴我們，大牛市跌唔落就要升。 資料圖片
戰友日日等大跌撈貨，但大市就包拗頸，調整後連升兩日，傳統智慧告訴我們，大牛市跌唔落就要升，為免一去冇回頭，唐牛噚日真金白銀入市，希望三千萬六合彩一注獨中，對象包括騰訊（700）、金
山軟件（3888）及北車（6199），三者以北車最值博︰整體A股較H股貴約兩成半，但北車A較北車H貴一倍有多，齋炒收窄差價已經好和味。北車連續兩日創收市新高，明顯行先大市一步，諗得過。
新股現恆建築（1500）喪升八成，開市價入場都執一成，有交代。睇好半新股再掀炒風，不妨留意百奧互動（2100），連日調整後噚日出現第一棍，有餘未盡。
主打內地兒童在線娛樂平台嘅百奧，舊年4月上市，但遇上市況不濟，一直潛水，至今仍較招股價低四成，但投資價值因而顯現。公司市值35億元，現金及存款達20億元，零負債，含金量冠絕科網股。舊年業績見紅，因一筆優先股錄公平值虧損，實際賺2.4億人仔，由於虧損屬非現金項目，對實際營運零影響。今年將會推兩至三款手遊，主打7歲以下兒童，避開年輕人戰線，可以殺出新血路。再講，百奧現價PB只得1.8倍，同業博雅（434）及IGG（8002）平均5.2倍，百奧等同三折大平賣！今浪大牛市，百奧有齊互聯網+及貨源歸邊基因，翻叮只係時間問題，中長線重見招股價2.15元，絕非不可能任務。
唐牛
https://www.facebook.com/tongcow88
唐牛
魚樂無窮 - 唐牛 舊文