笑到最後｜亞馬遜百萬機械人上線的啟示（高明）
笑到最後｜亞馬遜百萬機械人上線的啟示（高明）
a Getty Images) · JASON REDMOND via Getty Images
過去幾個星期，本欄不斷講自動駕駛，作為物理人工智能，除咗車之外，下一個概念一定係普及化嘅機械人，即係買機械好似買手機咁一人一部，或者一個家庭一部，要滿足以上條件，除咗機械人嘅動作要做得仔細之外，更重要就係安裝嘅AI有能力理解人類嘅指令，就係一路升級緊嘅語言模型。
美股外幣即時報價 多國新聞任睇
亞馬遜（AMZN）公佈，最近部署咗第100萬部機械人，遍佈旗下全球超過300個工廠。
亞馬遜機械人嚟自2012年收購Kiva Systems，當時開發自主移動貨架嘅機械人。最新推出嘅Vulcan係Amazon第一部有觸覺嘅機械人，2025年5月面世。佢有兩條機械臂，配備六軸力感應器，可以準確控制處理物件嘅壓力，模仿人類靈巧度。
機械人本身嘅硬件係肌肉同骨骼，靈魂就係個人工智能AI，亞馬遜就會採用DeepFleet，係一個基於AWS SageMaker嘅生成式AI模型。佢好似倉庫交通控制系統，動態安排機械人路線避免擠塞，提升10%行程效率，系統同時處理幾千部機械人，實時考慮包裹緊急程度、電池壽命同工作區活動，亦都解釋咗點解每間Big Tech都要自己研究一個大型語言生成模型（LLM），因為係物理AI嘅前題，現時大家樂此不疲咁用AI，雖然好多服務都要畀錢，但用戶都係產品，大家一齊幫手訓練緊個AI。
亞馬遜現時全球員工約156萬名。100萬部機械人數量接近人類員工三份二，公司雖然話目標係輔助而唔係取代，但如果要跑大每股盈利條數，或者經濟不景時，人類開刀嘅機會遠大於機械人，事實上炒咗個機械人對盤數都幫唔到手。
大摩估計，2024年一部人形機械人成本約20萬美元，2028年跌至15萬美元，2050年跌至5萬美元，中國製造嘅平版機械人到時應約1.5萬美元。如果第時普及一般人可以買嚟當家傭，跌到2萬至3萬美元應該先係可以圍皮嘅水平，大約等於三四年菲傭年薪，條數就有得計，當然，都可以肯定用家一定要畀某一個水平嘅AI月費先用到進階版本，又或好似Tesla（TSLA）啲車咁要買FSD自動駕駛，出車時要畀嚿錢買斷。或者淨機價會有基本功能。
自動駕駛本身可以做網約車，如果一部自動駕駛汽車加上一部機械人，可以做淘寶收發貨、可以做美團（3690.HK）外賣仔、如果隻AI夠力，可以做埋搬運，語言模型本身已經取代好多文職，如果出現物理AI，下一波就會取代藍領。
當然，人力成本低嘅地區會有免疫力。假設機械人最終約20-30萬港元一部，大約同買部車差不多，請兼職畀最低工資隨時請隨時炒，買機械成本貴，當然不排除會發展至租賃，但一樣係會有成本同貴用。始終，機械人取代人類勞力，都係工資成本貴地區優先，太平真係不如請個人。
本欄認為比起想像，普及嘅機械人會出現得更快，因為語言模型嘅競爭，現時進步得好快，只要理解能力一達到、接收指令有一致性（現時有啲位唔算太穩定），其實啲機械人即使鬱動得笨拙少少，做基本流程工作都冇問題，AI晶片及語言模型變成剛性需求後，物理AI就會接力成為下一個炒作概念。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周六刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
