金融High Tea 2012年11月5日
金融High Tea——扮蟹者言
2012年11月5日
■想退休後得享更美好生活，宜勤於檢視自己的積金帳戶。
資金湧入未停，金管局上周五晚再入市沽港元50億，港股亦升不停，上周五升穿22000點大關，收22111點，升289點，雖然話港股升得多可能會回吐，但港股升勢有餘未盡。上周五美股杜指跌番139點，在總統大選前有點波動，港股都有少少回調壓力。
恒指已大幅升穿今年2月20日高位21760點，但國指距1年高位仲有1100點，即係10％。國指咁落後，同5月開始外資極度擔心中國經濟會硬着陸有關，但呢種擔心正慢慢散去，所以我估國指會追落後，很有機會升番上全年高位，可趁回吐時吸納，博食10％水位。
國指可追落後
股市就係咁，悲觀時好悲觀，甚至過度悲觀，樂觀時好樂觀，甚至過度樂觀。現時是樂觀的時候，有股不妨坐坐，等待更樂觀的時候來臨。你話國指低，內地上證綜指仲低，現價2117點，比早前創的4年低位1999點，只是高了6％，你話而家股市過高，我看未必。美國個個月印400億美元，如今這些資金重作風險投資，離開避險資產，重投包括中國、南韓在內的新興市場，大有借勢炒番一大轉的味道。
股市升番，特別恒指上番一年高位，好多蟹咗好耐的讀者、網友都蒲番出來問功課，例如網友「吾識炒」話：「手上有蟹貨信義玻璃
(868)只是見一半家鄉(上周五收4.69元，估計佢購入價過9元)，等咗好耐都無進展，點處理好呢？另有兩手和黃
(013)，上周五收79.35元，1手而家平手，1手仲輸15%，平均仍有7%先平手，點搞呢，之前輸得多， 而家見升市都唔敢買，唉！」
又例如網友torreskk問︰「本人持有少量微創醫療
(853)，蟹貨價4.8元，發覺9月和10月公司不斷回購股份， 而股價也不斷上升， 也好像升得急一點，看走勢可否繼續再上，定衝不破近來高位4.35便走人呢？」
愈跌愈溝扮蟹
我在網誌上已答了他們個別股票的問題，但我想借呢個機會，寫一篇「扮蟹者言」(擺明係借張五常大教授本大作『賣桔者言』條橋起題)，講吓扮蟹經歷，寫下解繩之道。最近同一個朋友A飲茶，先知道佢大手買入思捷
(330)，佢都係最典型嗰隻，2007年年中在90元開始入呢隻股，我問佢當時思捷前老闆邢李源係咁沽，點解你咁高仲去買，佢話都係見佢升，人買我買啫。買入後繼續升，好開心，同年10月升到120元當然無放，當時睇200元(呢個「目標價」唔知點定出來)，之後隻股見頂急回，到2008年跌市時，跌到60元唔單止無止蝕，仲溝，用相同錢買多一倍，之後跳崖下插到無眼睇。到2011年7月插到20元佢又溝，但隻股愈跌愈有，佢就無眼睇。都係最近又來低價二供一股，以8元低價供股，較宣佈當日折讓36%，才惹起佢注意。
我問朋友A買咗幾多錢？ 佢話「唔係好記得。」這是蟹族第一個特徵，選擇性失憶，既然輸錢的回憶咁痛苦，就唔好理佢啦。我再問得兩問，佢先至話，大約每次50萬啦。我「嘩」一聲，三次加埋大約150萬？ 做乜買問多？ 佢的答案都係一嚿嚿，「信佢可翻身」、「聽收音機話呢隻嘢可溝」、「見輸咗咁多唔爭在輸埋呢次」。
唉，我當時心諗，「如果你畀車門夾斷隻手指，唔通會話『既然夾斷咗一隻唔爭在伸埋第二隻手指畀佢夾』咩？」不過我忍住無講，怕佢頂唔順去跳樓。散戶買股扮蟹三步曲，第一式盲買，第二式溝淡，第三式失憶，佢真係典型過典型。
身子弱宜防守
我粗略一算，佢夾埋買咗3萬9千股，上周五收10.92元，用咗150萬去買，而家得番42.5萬，唔見咗71%。佢問我好唔好供股，我話供唔供股除了睇隻股前景，仲要睇你自己的環境，你賭到咁大，仲跟？若供股佢要供1.9萬股，放多15.6萬落去，使唔使買咁多呀？
好多股民扮咗蟹之後，會打電話去電台問功課，有啲主持好專業，回答得好審慎，但有啲主持非常輕率，散戶話咗扮蟹，佢覺得隻得，可能只係覺得隻股會反彈，就叫散戶買多啲溝淡，佢其實唔知散戶買咗幾多，佔佢身家多少，有無溝過、見隻股反彈習慣走唔走等等，簡單俾個意見，可以遺害好大。至於朋友A供唔供股，我認為思捷供股集資後能否轉型成功，機會只係五五波，揸耐少少等反彈高啲唔拘，但暫時未見到隻股具備長揸的條件，我同佢講，你買咗咁多，唔好再買啦，要麼沽掉供股權就算，要麼沽現貨，沽到多少供多少，唔好再加大注碼。你身子弱，不宜進攻，只好防守。
聽完呢個扮蟹者言，我有好多感觸，首先唔好貴價追熱股，貴價買股本是原罪。其次炒熱股唔緊要，定好一成止蝕就得啦。第三唔好加碼溝淡。若錯事做齊，加碼搞到成手蟹貨，下一個浪來時，只能費心思如何「拆蟹」，不能自由落場，所以一切問題都是由買貴貨無止蝕開始。
和黃仲可以睇
講開拆蟹，亦有方法。主要睇兩方面，一方面是大市和個別股票的前景，另一方面是自己扮蟹的程度。一般人只注意前者，無留意後者。先論大市和個別股票前景，好似目前的大市，以之前講的網友「吾識炒」買咗和黃為例，佢平均仲輸7％，我估佢成本大約85元，現價79.35元，和黃今年高位82.4元，兩年高位96元。現時和黃股價略落後於大市，合理估計和黃重回今年高位82.4元不難，但要去番舊年高位96元有一定難度，當時恒指上過近25000點高位，和現今距離頗遠。保險做法等和黃升上82.4元時先沽三分一，升穿85元再沽三分一，到再升穿90元時沽埋其餘部份。
我話除了睇客觀環境，也看主觀環境，即係自己扮蟹程度，我的原則是自己年紀愈大，隻股佔自己倉位愈多，買入價愈貴，愈要保守，早一點分段出貨，若太貴入貨，想隻股上番自己的入貨價並不現實，唔好一個浪升完，一股都無沽過，照樣坐艇。相反，年輕力壯，入貨價不太高(如唔識炒呢種價唔算高，計埋收息接近唔使輸)，反而不妨坐吓，唔一定一到成本價就出哂貨，若大市許可，可以等到明年二月佢出業績前炒起時才沽，否則沽完見佢不斷升，又會十分揼心。
做咗大閘蟹，想拆繩不容易，最佳辦法一係作長線投資，只買肯派息有生意前景的好股，可以唔係咁在意佢啲股價。一係短炒定止蝕，唔好俾自己做蟹。
陸羽仁
上一頁 下一頁
金融High Tea 舊文
外國家的強權行為，更是不能認同，可是從一個國民的角度考慮，只要一個政府凡事都可以從國民的角度著想，外交政策如何，可能都不太重要。 
電郵
列印
獨立觀看字體
