金融High Tea 2012年9月10日
金融High Tea——慎防「討厭式」升市
2012年9月10日
■上周發改委大量審批新項目，刺激內地金融股和「鐵公基」股上揚。新華社
歐洲央行推出買債計劃，歐美股市反應良好，是意料中事，港股、特別是內地股市大升，卻有少少出人意表，恒指上周五升3.1％已經唔算誇張，內地上證綜指大升3.7％，芬佬朋友坦言當日當日下晝見到個市咁樣，焗住追貨。
上周五港股一級級咁上，在期指市場每到一個大關，都見幾百張一沽盤一下子被人食晒，推住指數上。恒指最後大升592點，收19802點，成交大升到930億，扣除幾隻大股批股的200億，都有700幾億成交，係平時兩倍。港股升得咁勁除了歐洲救市因素外，還有一大一小因素，小因素係特區政府的「港人港地」政策無乜料到，搞到地產股大升，大因素係紅色股係咁升，主要受內地股市暴升帶動。
上證綜指上周五升75點，升幅3.7％，收2127點，開始遠離上星期三造出的2029點四年低位。而上周五上海深圳兩市成交合共超過1500億，同樣是大成交向上的格局。
推1萬億 出手救市
過去兩個月港股係一場悶局，無論美股點升近4年高位，由於內地股市相反地跌向四年低位，港股被內地股市拖住，一升少少就回，在低位拉布，結論係內地股市氣氛一日唔改善，都唔可以睇好港股。本來更驚歐洲和美股在這一兩個星期出招救市完畢後，反彈力耗盡回吐，若果內地股市到時仲未得，港股會出現跟跌唔跟升的慘局。
內地股市有少少轉勢跡象，主要是由上周三發改委大量審批新項目開始。阿爺早就覺得股市跌得太殘，不斷出招救市，第一招係出口術，由中國證監會領導13次喊話指股市有投資價值，叫人入市，可惜無乜效。第二招係由8月以來無批過新股IPO上市，這接近一個半月的停擺，按理也是對市場釋放重要訊息，但內地股市還是照跌如儀。結果就出到第三招，由國家發改委大量批出建設項目托市。
西方一直等待中國推出2008年那種4萬億人民幣救市大計，可惜等來等去都不見影。不過今次發改委排山倒海大批基建，總投資涉及1萬億人民幣，開始有點大灑金錢的味道。就是在上周三內地股市見四年半低位當天，發改委批出25個城市鐵路項目。上周四內地股市反應還不大，但當天發改委再批出30個公路建設、港口航道改造及污水處理項目。同一晚上歐洲央行公佈入市買債計劃，翌日內地股市大升近4%。
你可能會話內地股市可能只因歐盟救市而升。不過近期內地股市超弱，對外圍的利好消息好像完全免疫那樣，經常是外圍大升佢小升，甚至唔理外圍照跌，上周五咁樣大成交大升市，事不尋常，而且主要以金融股和「鐵公基」股帶動(即鐵路、公路、機場、水利等重大基礎設施建設股)，明顯和中央批出1萬億項目有關。
鐵公基股 行業之星
上周五內地股市有幾大行業升得特別厲害，銀行和金融業大升5.7%、能源行業升5.4%、建築和工程業升5.3%。但若以個股計，「鐵公基」股、水泥、煤炭、鋼鐵、機械等周期性行業股票升幅最大，不少升到超過10%要停板，令人聯想起2008年推4萬億救市時的市況。
內地證券界馬上找回2008年4萬億救市計劃啟動後一年內地股市的狀況，發現升幅最大前三大個行業是有色金屬升260%，礦業採掘升210%，房地產升160%，那麼今次會否迎來相同的盛宴？
市場暫時的結論是這次基建救市有異於上次，首先是規模和層次不及上次，上次有4萬億，今次暫時只有1萬億；上次是全國推項目，今次是地區性；上次相應的行業如機械、水泥等公司產能都大力擴產推上一個台階，但其後產能過剩，今次投資計劃也只是彌補對上一輪產能需求的空缺，即係話唔好期望相關行業透過今次政府的投放可以大幅擴展。
當然，更加悲觀的人可以話，中國經濟三頭馬車︰投資、出口、內需，出口完全唔得，內需又未能發展起來，最後又係靠政府投資搞基建，掂唔掂㗎？我就認為長此下去可能唔掂，但作為中短期刺激經濟措施，由政府投資基建項目，係最有效的方法。項目快速上馬，先拉動銀行業的貸款需求，然後就是能源和材料，然後就是機械和建造，不要期望這些行業急促發展，只要它們把過剩的產能調動起來，相關企業的盈利馬上會改善。
大轉捩點 快將出現
在大跌市中，我們最想找到轉勢的轉捩點，目前內地有可能正出現經濟和股市的轉捩點，當然，要捕捉轉捩點，就要冒一定風險，因為萬一轉捩點未出現，大市續跌，投入的資金就有犧牲。我說「有可能」出現，皆因中國出口形勢好差，經濟下行壓力好大，管理層又受制於不想出力過猛推高通脹推升樓價的顧慮，出手留有餘地，令人擔心中國救市力度不足，未有能力推動轉捩點出現。不過無論如何，當中國股市愈跌愈低時，已營造了大轉捩點快將出現的勢頭。
上周五好多散戶見市升沽貨，但大市愈升愈有，主要是基金入市補貨，芬佬係焗買。大家可能無留意，美國出現「討厭式升市」，好多基金唔睇好後市，持貨量低，點知美股愈升愈有，杜指由年初至今升8%，差不多到四年高位，令基金跑輸大市，到最近不得不追貨，而且一路追，一路鬧，話美國經濟得1.7%增長，失業咁高，點解美股就快上番2007年的大牛市的高位？我話而家錢太多，危機一出現錢馬上走清，風頭一過又焗買，在焗買的階段，你話「唔應該」升咁多，你愈講佢愈升喎。
過去呢個情況只在美股出現，內地和香港股市「好應該」咁樣跌。我就話小心這個情況也在香港的國企出現，過去內地股市之跌，主要因為阿爺嘞緊褲頭，如今佢放水於項目救市，情況又會轉變。以港股為例，基金手上現金多貨少，特別減持咗好多國企，無乜貨，當內地經濟一有少少轉勢苖頭，基金就要撲入去買吓先，以免又好似美股，唔信佢升又畀佢升咗上去，早追好過遲追，這就解釋了上周五中港兩地點解咁大成交。
至於散戶，就真係睇你貨多定貨少，貨多唔使急，但如果你貨少手上有八、九成現金，又不妨補吓貨喎。
陸羽仁
上一頁 下一頁
金融High Tea 舊文
時可以獲得連任，現在更成為民主黨是否可以繼續掌管白宮的秘密武器，克林頓除了懂得食雪茄之外，還有其獨特之處。不過，奧巴馬的真正對手，到底是共和黨，還是克林頓？如果奧巴馬成功連任最大功臣是克林頓，那麼奧巴馬未來4年到底真的可以繼續「Change」，還是活在克林頓的陰影下？屆時會否希拉莉才是真正的美國總統？ 
電郵
列印
獨立觀看字體
