金融High Tea 2012年6月18日
金融High Tea——扭曲炒作
2012年6月18日
■港交所收購LME交易對股價短期有負面影響，是不爭的事實，但長線係唔係咁差，值得商榷。
上星期五港股示範反轉玩的典型。當日大家都震震哋，心諗希臘大選在即，開大開細唔知，恒指開市升116點，跟手好快再升多100幾點，散戶都無心戀戰，好怕下午無人敢持貨過周末，所以上午沽貨的人多，買貨的人少。大家又點估得到，下午3點後不跌反升，最後要升425點先至收場。
我當天早上10點幾打電話經紀張，佢話我係第一個電話，散戶無人敢做嘢，電話都唔打俾佢，佢都怕個市下晝會散。我同佢講，我見個市升都想沽番啲貨出街，唔想等希臘選舉，星期一無事再買番都未遲，但我決定唔郁，我怕人同此心，大部散戶都咁諗，咁個市又會唔會同散戶同一個方向走呢？
結果個市升到七彩，到下晝四點三期指都收埋市後，我再打俾經紀張，話炒作要搵對手，大戶想搵睇淡的散戶做對手易過食菜，結果夾夠400幾點先至離場，炒期指的散戶血流成河。美國聯儲局成日搞扭曲操作(沽短債買長債推低長息)，我話香港期指市場，玩緊啲先至係扭曲炒作。
夾四百點 殺盡淡友
經紀張問我如果大戶造好倉夾淡友，萬一希臘選舉爆大鑊，佢哋成手好倉，咪好頭痕？我話你唔使同佢哋擔心，第一上周五夾升400幾點，大多數淡友散戶輸100、200點都止蝕離場，所以大戶起碼食咗一半胡以上。第二，若大戶的好倉未清晒，若希臘選舉完無事，再挾上殺多一浸順理成章，你見到應升唔升之時，才是大戶平倉之日，因為只有大戶大手沽期指，才會壓住大市升唔多。若希臘選舉出事，大戶力大，一開市就頂住個市唔大跌，應該跌500點只跌200點，股市玩半日就喘定，到時好多分析家見個市跌唔多，又會解釋一番，話市場憧憬救市之類，一定有個理由講得通，夾升400點俾番200點俾你，你話邊個贏？大戶的倉底是好是淡，左右大市去向。
講解這些「扭曲炒作」，只想告訴大家，股市短線炒作，只是一個賭場，而且是一些超強實力的大隻佬，同懵吓懵吓的細路仔在對賭，大隻佬仲睇埋細路仔的底牌去賭，你話細路仔贏面幾低。散戶炒作如要在無方法中尋求方法，首先唔好同群眾行同一條路，好似上周五人人都話要沽貨走避，你唔去買，都唔好跟手去沽。其次要從「不合理」的現象找線索，例如見到美股上日大升港股唔升，可能上一日港股提早升了，或者大戶在借好消息沽貨。
總而言之，散戶估的方向，多數是錯。唔係散戶無眼光，而係大戶偏要同散戶對賭，大戶力強取勝，只要扭曲短期走勢，就可以夾死散戶。
劍指海外 只買前景
港交所
(388)成功劍指海外，以167億元奪得倫敦金屬交易所(LME)，港交所的「奪寶價」高出市場預期，但主席周松崗認為「物有所值」。港交所將以內部資金及銀行融資支付收購所需，已向4間銀行合計取得132億港元備用信貸額度，但不排除日後配股或發債融資。
港交所收購LME的作價比市場傳聞的最高價還要高7%，證券界普遍認為這會令港交所股價受壓。睇番這個167億奪寶價，若以LME去年純利9200萬計算，收購市盈率高達180倍，表面睇係買貴貨。
點解港交所咁貴都要買呢？ 我找了解港交所思路的知情人士傾過，佢話睇LME唔可以用目前的盈利睇，LME雖然係咁重要的交易所，但仍然係全球少有仲係用緊會員制經營的交易所，交易仲係用緊喊價方式，未改用電子交易，運作方法非常傳統，但係呢間交易所的地位好重要，佢哋20幾個主要交易商，基本上左右了全球商品的定價。你咪睇佢只賺9200萬，因為佢過去目的只是為會員服務，收取好平的交易費用，所以盈利咁少，可以話盈利和地位極不相稱。換了港交所做大股東，會傾向更商業化的方式經營，未來盈利便不是這個樣子。
擁定價權 難以複製
我問用167億咁高價去買LME，LME的經營模式可否複製？佢啲主要會員沽股權搵咗大錢後，會唔會另起爐灶同LME競爭？或者LME換咗老闆後，客戶改去芝加哥商品交易所等地交易？知情人士話LME好難複製，不止慣在倫敦交易的人不會話走就走去芝加哥交易(也有收費考慮，LME收費較便宜)，很多在LME進行的金屬交易最後要現貨交收，LME在全球好多地方都有金屬倉庫，以利買賣交收現貨交收的交易商，單是金屬倉庫便難以重新設立，不是話搞商品交易所就搞商品交易所。
現時有些主要金屬中國的使用量可以佔全球的三幾成，但中國的商品交易所未成氣候，主要因為人民幣不是流通的硬貨幣，中國的商品交易所不對外國交易商開放，而港交所可以做個橋樑，導引更多中國商品交易到LME去。
港交所自己預計收購LME後3年才有盈利貢獻，表面睇無乜着數，惹來不少批評，例如股評人David Webb就形容是次收購作價太高，未見協同效應，對港交所股價短期有負面影響，如要透過配股集資，現有股權將被攤薄，勢令股價急跌。
港交所收購LME交易對股價短期有負面影響，是不爭的事實，如今市道唔好，港交所動用巨資去收購一項不會即使產生重大效益的資產，難免遭人垢病，但長線係唔係咁差，值得商榷。
短期負面 長期正面
睇睇如今五大國際交易所的市值排行榜，美國芝加哥商品交易所排第一，市值1412億港元，港交所排第二，市值1215億港元，排第三的是做衍生產品和場外交易的美國洲際交易所，市值731億，排第四的才是做傳統股份交易的美國紐交所，市值480億，排第五的是新加坡交易所，市值409億。
港交所現價112.4元，歷史市盈率23.8倍，睇吓芝加哥商品交易所的市盈率只有11.4倍，美國洲際交易所市盈率亦只係18.8倍，點解港交所市盈率高佢哋咁多？主要因為內地股市未開放，香港上市公司中有一半係內地巨企，香港成為內地的影子股市，所以睇好港交所可以再做大的前景，而非現狀。同樣道理，港交所買LME同樣是一個概念交易，買的是一個未來，中國是全球商品的主要用家，但全球最大的商品交易所不在中國掌控之中，中國只是用家而非莊家，表面睇有啲唔合理，如今港交所買LME，長線既會導引更多中國商品交易到LME，亦會間接令中國在國際商品期貨的定價權增加，相輔相成。國家開發銀行參與港交所的收購融資，不正正說明阿爺也支持此一交易。
所以港交所收購LME，講數字無得講，亦會令佢短期股價受壓，但長線而言，有概念喎，捱到市道好時就可以炒吓囉。
陸羽仁
上一頁 下一頁
金融High Tea 舊文
計，就是希臘在不久的將來又要來一次大選，問題只會不斷持續，直至退出歐元區。這麼絕望？我由一開始已表明立場，歐元根本不應存在，在這方面我是沒有任何補充。 
