金融High Tea 2012年7月16日
金融High Tea——股平樓貴難永續(下集)
2012年7月16日
■前投行大佬指，一般人買樓好過買股，因為買樓有槓桿外，加上買樓焗你長揸，但買股好易出出入入，唔贊成投資者買股「游水」，大部份股民沒有合適心理質素。
上周五是「黑色星期五」，但股市並不黑色，內地公佈第二季經濟增長只有7.6％，市場相當冷靜，內地上證綜指微微升咗一點都唔夠，等如無上落，收2185點。港股亦撐住19000點大關，收19092點，升67點。
不過呢個黑色星期五去到美國仲精采，早前摩根大通深受「倫敦鯨」交易員投資失利影響，但上周五佢公佈上季業績較市場預期佳，股價勁升6％，帶動整片美國金融股抽上，再加上歐美投資者認為中國7.6％經濟增長，不是硬着陸，杜指爆升203點，大升1.6％，終止連跌六日的頹勢，港股應有反彈，特別係跌得好殘的內銀股，應有像樣一點的反彈。
大戶操控詮釋權
股市就係咁，上上落落，壞消息面世時，又話「好過預期」、「其實唔係咁壞啫」，股市升彈。股壇老雀極短炒時鍾意炒相反，認為如何詮釋市場資訊的權利在大戶手上，佢地鍾意同散戶做對手，所以要極短期炒作，只能在市場評價好差時買，在評價好好時賣。
上星期寫了篇文「股平樓貴難永續」，講起網友「硬道理」在09年中因錯判市況，將05年入市的自住樓賣掉，然後將所有資金分段投放在A50
(2823)及工行
(1398)上，如今樓價升了，投資的股票跌了兩成多。文章見報後，迴響不少，有不少甚為專業的老友都有評價，可以寫寫他們的寶貴意見畀大家參考。
第一，順大潮流炒作。有一個擅作價值投資的老手，睇完「硬道理」棄樓買股的手法，有此感歎，「買股票要年年有表現，其實近乎炒作，不是投資，炒作要順勢，唔講你個網友『硬道理』把自住樓賣掉，要冒上替代使用成本高升的風險(租金上升)，單就炒作而言，佢啲做法都是逆勢施為。」
投資老手話，股神巴菲特咁成功，除咗佢善睇公司價值，低價入市之外，佢都有「順勢投資」的味道，才不止長線有表現，而且中短期都有表現。例如佢在2002年、2003年以2元多的低價大手買入中石油
(857)，除了因為中石油股價低迷外，還睇到2002年911事件後，美國大幅降息，美元將持續走弱，石油等商品價格將長線走強的大趨勢，當時美國石油股唔便宜，就買吓中國石油股，結果食正油價連年大升的潮流，多年後就在10元以上沽出中石油獲利。
股神都要順勢買
又例如巴菲特在2011年1月以440億美元收購美國第二大鐵路營運商伯林頓鐵路公司(BNSF)。巴菲特雖然聲稱這次收購是對美國經濟前景的一次豪賭，但如果真係咁睇好美國經濟前景，點解係買鐵路公司而唔係買銀行？巴菲特係睇住美國正發生可能長達10年的非槓桿化過程，靠借貸賺錢的銀行唔係咁掂，投資進入低回報年代，加上油價高企，所以就買入鐵路這種回報較穩定的傳統公用事業，這種行為和李超人去英國買電廠、水廠有異曲同工之妙。當然，巴菲特偶有睇錯大潮流出事的投資，例如油價高睇好電動車，過份放大呢個行業的發展，入股比亞迪
(1211)，結果概念掂生意唔掂，股神勝在以8元入股比亞迪作價夠平，所以佢未死只是跟風者死晒。
投資老手話「硬道理」在09年買入工行和A50基金長揸，事後睇係逆勢投資，因為阿爺在08年驚得滯大力投放4萬億救市，令股市和樓市當年升得太勁，再加上基建泡沫，觸發巨大通脹，2010年開始要收水救亡，這種收水潮，對投資內銀的氣氛不利，「硬道理」投資失利，係睇唔啱呢個收水大勢。反而好多人中短線炒吓內銀，跌得多買啲，升一兩成走人，仲搵到食。
第二，買樓有利長揸。我有另一個老友是極資深投資銀行前輩，佢20年前係巨型銀行的投資銀行部揸fit人，一直鍾情股票長線投資，唔喜歡買樓，當然佢亦有兩三間樓畀自己和屋企人自用，但他和香港人大多數發達方式不同，主要投資放在股票之上，而且係20、30年咁長揸。
這位投行前輩舉咗個例，佢話當年佢在包銷上市的公司中，揀啲好啲公司，用好少錢例如一、兩萬去買它們的股票(呢啲錢在他而言只是零錢)，買咗十家八家公司股票，夾埋只是用咗十幾萬，到而家無計歷年收的利息都值400幾萬，當中仲扣埋有一家公司執咗笠股票變廢紙。佢話我可能唔覺得400幾萬係乜嘢錢，但佢只想試吓證明，長揸優質股票，揸得夠長有好回報。
散戶買股難長揸
當然，佢當年係投行大佬，睇住呢啲公司上市，知道晒佢地盤數真假，佢長揸的股票有質素。佢承認呢個係事實，普通股民唔識揀，好多時會揀咗啲垃圾股，佢以內銀為例，雖然好多人怕內銀有壞帳黑洞，佢就唔係咁驚。呢個前投行大佬係中國好友，話中國第二季經濟仲有7.6％增長，仲話已經見咗底，咁有乜嘢大問題，你睇吓歐美日的經濟有幾多增長？點解覺得美國好似安全過中國？美國最好的年代也只月3點幾巴仙增長，美國今年第1季增長只有1.9％，有幾好？所以拉長十年睇，佢唔覺得股票投資有乜問題，但你要日日問股價，日日去比較，咁就大問題囉，心理好易不平衡。
前投行大佬話，一般人買樓好過買股，除了因為買樓有槓桿外，還因為買樓焗你長揸，但買股好易出出入入，但完全唔贊成投資者買股「游水」(將長線投資的股份高位沽出低位揸番)，因為覺得大部份股民沒有合適的心理質素，所謂高沽，可能升少少沽咗，結果只有輸錢股會長揸，賺錢股一早就沽走。內銀現價息率4厘、5厘，點解唔可以長揸？佢認為若有心理質素長揸，買樓買股都得，只要選擇低位入市揸佢十年廿年就得啦。
第三，最怕係樓價追股價。聽完呢兩個朋友的意見，雖然好似一個話內銀唔得，一個話內銀得，其實只是中短線和長線的分別，內銀價殘，卻是大家都同意的事實。
有一個靚女朋友上周問我，好買唔好買一個西半山樓盤投資，16000元一呎，佢想買一個500呎細單位租畀人，話利息咁平，隨時供平過租，有租金淨收入。我計一計，500呎單位盛惠800萬大元，呢啲單幢樓實用率好低，500呎樓有300幾呎都偷笑，呎價真係貴得好緊要。但我見靚女貌美如花，好怕叫佢唔買一年後升到20000元一呎佢嚟找我晦氣，只能咁同佢講，樓價咁貴，但利息續低，升3成變20800元一呎當然有可能，但跌4成變9600元一呎也有機會，好似跌的機會大過升少少，就算升咗上20000元一呎，兩年內賣要畀特別印花稅，利潤無咗一大截，叫三思才好後行。
靚女又問睇完我話「股平樓貴」，係唔係股價會大升？我見靚女一面「炒相」，好似唔炒樓想炒股咁，就提佢小心係「樓價追股價喎」，在這種百年不遇的金融海嘯中，投資唔好太冒進啦。
陸羽仁
上一頁 下一頁
金融High Tea 舊文
是希望看到公眾人物真正的一面，那麼《How I Caused the Credit Crunch》絕對是金融界的八卦雜誌，因為此書絕對可以滿足大家希望窺探金融界真實一面之好奇心，而且並沒有任何創作成分。 
電郵
列印
獨立觀看字體
