金融High Tea——打折唔買貴價買？
2012年10月22日
■股民見到百貨公司減價打折會仆去買，但見到股票回落就唔買，呢種心理其實不一定好科學，趁股票下跌時去買，應是明智之選。資料圖片
美股升得多終於倒插，多家美國公司公佈的季度業績差過預期，令上周五杜指大跌205點，跌幅1.5％，睇嚟港股都要跟手回吓，據港股在美國預託證券收市價計，比香港上周五收市低189點，暫時睇美股雖然急插，港股在外圍並無恐慌。
不過即使係老外自己評美股，仍然相當老定，話雖然仲可能再跌，但就唔係大跌那一種。美股今次回落同美國公司第三季業績差有關，呢一期美國各行業表現參差，銀行股合乎預期；工業股和材料股受全球經濟需求疲弱影響，收入下降但亦在預期之中；最出乎意料之外係科技股唔係幾掂，谷歌業績未達預期，上周四跌咗8％，上周五再跌1.9％，直情有人話谷歌生意可能從此轉勢下，佢每一點擊收入意外下跌，因為用家由個人電腦轉到移動媒體上網，但移動媒體廣告市場未成熟收入少，影響了谷歌互聯網收入。
Wintel瓦解聯想要避
另外所謂Wintel的成功模式正在瓦解中，所謂Wintel即是由微軟視窗(Windows)加上英特爾晶片(Intel)所組成的個人電腦組合，在智能手機和平板電腦衝擊下，逐漸失卻優勢，微軟(上周五股價跌2.9％)和英特爾(周五跌1.9％)業績唔掂，軟件業面對頂頭風，硬件公司亦唔得，例如剛被聯想(992)搶去個人電腦全球一哥位置的惠普電腦，上周五跌2.2％，戴爾電腦跌2.6％，佢哋面臨行業轉型的巨大挑戰。
搶咗人地生意的蘋果，雖然在iPhone 5推出後，股價由高位705.07美元，回落到而家的609.84美元，單係上周五都跌咗3.6％，市場還是相信未來仍是移動工具的世界。
由於香港的大股都是和買美股的同一班基金玩，所以港股炒作類型多多少少都跟美股走，美國板塊升沉，對港股有啟示，你比較一下聯想和匯控(005)近期走勢就知，美國銀行股掂，匯控就改變弱勢一級級咁上，相當強勢，上周五收76.55元，雖然呢一兩日可能跟美股回調，回到74元應有支持，可在接近此水平可吸納短炒。聯想在8月中上過6.96元高位後，卻一級級咁落，上周五收6.29元，我估佢弱勢持續，股民要避一避。要知道美國佬講緊Wintel模式瓦解，PC行業範式轉移，即使聯想做得比同業好兼且在佢主場的中國仍有增長，投資者將個人電腦視為夕陽行業，聯想股價會長期低迷。
干預匯價股市例升
另一隻科技大股騰訊(700)狀況好好多，佢和谷歌的生意模式不一樣，業務多樣化，例如在手機平台上佢力推Wechat微信應用程式大受觀迎，兼且深受中國增長市場推動，估計外圍狀況差對佢影響不大。總而言之，美股在呢個業績期中，科技股公佈的業績透露出移動平台侵佔個人電腦的趨勢，將有持久性的影響。
另外要講講大市。另一單新聞同樣值得注意，就是金管局終於要入市壓低過強的港元匯價。熱錢流入香港，港元匯價持續偏強，終於升穿強方保障7.75的位置，最高見過7.7498，搞到金管局要入市干預，買入6.3億美元，頂住港元唔俾佢再升，令銀行體系結餘在下周升到1553億港元。這次是09年以來金管局首次入市干預港元匯價，在08年第四季至09年底期間，美國因為對抗金融海嘯，大幅放水推出QE1(第一輪量化寬鬆)，觸發大量資金流入香港，本地銀行體系結餘也因此由08年10月前的100億港元，大幅上升至09年歷史高位3200億港元，後來才慢慢回落。
有金融界猛人叫我留意港元匯價和股市的關係，資金流入，港元強勁，通常和股市上升同步，恒指在09年3月見低位11900點，但到是年10月已升番上去22500點。香港有聯繫匯率，資金流入香港不易賺到匯價升值，所以除非有人在炒港元脫鈎，否則資金流入只為投資，部份可能會投到股票市場去，所以資金流入時股市通常會升，雖然QE3的水量遠不如QE1，對股市的刺激較少，但資金在流入時，唔好太快睇淡股市。
故此美股上周五跌200點，港股回調，反而係投資機會。上周股市還在大升時，好多散戶想買，我就唔想叫人在急升時硬追，因為股票急升後往往有回吐，追得太急遇上回吐，即使將來可能再升，都會吃了眼前虧。股票回調時，借一借股神巴菲特的比喻股民反應，股民見到百貨公司減價打折會仆去買，但見到股票回落就唔想買，呢種貴先至去追的心理，其實不一定好科學。資金流入股市，大勢還向上，趁股票下跌時去買，應是明智之選。
股市回調吸納良機
升得較多的是材料股和內銀股，相信佢地會回得狠啲。大家除了可低吸內銀股之外，還可以留意兩隻紅色指數股：恒生H股ETF(2828)和安碩A50基金(2823)。2828追蹤香港國企指數，2823追蹤內地A股指數，最近2828特別強，破位向上，理由好簡單，若外資流入香港規避美元下跌之險，見到中國經濟可能在第三季見了底，唔想揀個別股票，就會買香港的H股基金，買一籃子紅色股。恒生H股ETF(2828)上周五收108.5元，若回到104元可買，進取一點今天可以開始分段吸。而安碩A50基金(2823)無2828咁強，主要因為A股反彈幅度不如H股，但內地A股亦應該見咗底，2823走勢都唔差，上周五收10.12元，若回到9.7元亦是吸納良機，也可以現在開始分段買。
個股其中一隻較易捉的是內房股王中國海外(688)，佢走勢係一種靚到絕的級級向上圖形，上周五見今年高位20.75元，收20.25元，若回到19.5元可買，若在低位買到，等佢走一段，就有10％回報，到時可以沽一沽等如回調再買番，穩陣啲定番10％止蝕。
宏觀上環球投資市場還是在一個又一個迴避風險/風險投資的循環中。央行招數用老，經濟向下，避險意識增加，股市一個浪下行。跌到咁上下，央行頂唔順，再出招放水，風險投資意識增加，股市又一個浪反彈。在下跌浪中唔好太快睇好，唔係一個浪尾都打死你。但在反彈浪中又唔好太快睇淡，否則佢回一回又上衝，你不買白不買。唔通平價時唔買，貴價時焗追咩？所以我見個市升得多，都想佢跌多啲，等我可以補吓貨。
陸羽仁
上一頁 下一頁
金融High Tea 舊文
