中環在線：奇景！Mr. Cool李澤鉅識講笑
■李澤鉅（左）心情靚全程笑曬。
「超人」李嘉誠每次同傳媒見面都有問必答，上至業績、政治，下至拍拖買樓都任問唔嬲，佢嘅接班人「小超人」李澤鉅出名cool，一句起兩句止，做傳媒當然擔心以後冇米落鑊啦。不過噚日小超人出巡，就一改常態，全程四萬咁
口，相當nice，除咗例牌評論樓市，就連意大利政局都講埋。
稱「冇乜大轉變」
小超人出席屈臣氏購物概念店CKC18開幕禮，唔知係咪坐正做長和系主席之後，心情特別好，不時同記者開玩笑，一洗過去嚴肅形象。當有人問到意國政局不穩，會唔會影響集團歐洲佈局，佢笑住話「嘩，乜你諗住喺度食埋晚飯啊？」咁驚唔驚意大利政局不穩好似骨牌？佢就話「嘩，乜你咁悲觀呀！」
佢又笑住話，原本諗住唔到，但CKC18開正喺長江中心地下，惟有焗住出席支持喇。問佢做咗主席有乜唔同，雖然類似問題問過N次，佢都保持笑容話「已經答過好多次，冇乜大轉變」。老實講，呢條問題連華華都聽到厭，但深信未來一年都仲係必答題。
今次小超人出巡，自然有「群臣」相伴，例如屈臣氏集團董事總經理黎啟明、豐澤總經理區文慧、百佳超市董事總經理黃皓經等，零售部門阿頭曬冷式出場。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com
