智取大市：零售股贏家全取
■周大福噚日股價升大5.7%，為金舖股贏家之一。資料圖片
一日落地獄，一日衝返上天堂，莫非有戲劇性嘅重大消息出現？當然唔係。恒指保持長方形走勢之內，格局未有大變，只不過跌到去長方形底部時，投資者驚由難捱嘅上落市變成大跌市，自然會悲觀啲。
望嚇美股嘅標普500指
數，走勢絕不差，甚至浪比浪高。有大行睇美股年內再破頂之餘，反而冇人敢講港股會破頂，更有大行睇恒指年尾得31000點，反映港股投資者比其他市場悲觀。
資金瘋狂翻炒消費零售股、油股，以為醫藥股、教育股會回吐？原來係繼續升，單日港股升市未見到換馬跡象，反而係熱炒板塊大幅度擴闊，如果話熱炒股會一鼓作氣喪炒上去，就似乎有點樂觀，不過反覆上升問題不大，冇貨係等每次調整時吸納。
零售市道經歷4年低潮後，𠵱家進一步變為贏家全取，所以選股要小心揀中輸家。例如金舖股，好簡單，行嚇尖咀就知，假日期間，大部份周大福（1929）門店，每個Sales都有客要Sell，旺舖更加爆到飛起。六福（590）尖咀門市冇咁誇，但有部份舖都幾爆，至於周生生（116）就喺隔離拍烏蠅。噚日周大福同六福股價齊齊爆升，但周生生反而大陰燭下跌，可見呢個零售升浪，都有輸家嘅出現，揀零售股時不妨行嚇街就知點揀。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
