金融High Tea——北方無形之手？
2012年11月13日
北京開十八大逐漸入肉，就快選中央委員，選完馬上開一中全會產生政治局常委同埋總書記，估計本周四新領導就會登場。昨日港股悶悶地但跌唔到落去，收市仲升45點，多少都拜內地股市上升帶動所致。
開十八大狂吹利好
內地上證綜指昨日張圖簡直係一個小V形，先插後彈，早上高見2076點後橫行，下午開始插，近兩點插到2062點，但之後卻一個拗腰彈番上去，三點收市收2079點。
內地股壇中人熱議十八大開會期間，阿爺不斷放利好訊息，似乎唔係幾想個市跌，咁又係，若新領導上場時，個市跌到阿媽都唔認得，一來唔好意頭，二來股民心理上都有聯想效應，合理推斷阿爺明手暗手都會出下手，昨日的小V形反彈，或許可以視為國家隊在低位逐步架起防線。
事實上內地監管機構高層開緊十八大時，都不忘吹利好股市之風，包括中國證監會話股息紅利稅差別化徵收已獲同意(差別化收稅即持股愈長收稅愈少)；合資格境外投資者投資內地額度再增2,000億兼放寬投資比例；近期無推出股票國際板計劃等等。
中環茶友話，雖然好難話港股調整已完，特別是未知美股穩定了沒有，但阿爺很可能出手托住內地股市，對港股有點正面作用，見港股跌得多時可以買吓，博周四新領導上台時炒一炒。
港股昨日繼續玩震倉，早前升得多的股份回吐得特別厲害，如太陽能股、航運股和建材股就回得較多，太陽能股借住美國實施反傾銷稅回落，卡姆丹克太陽能(712)插10%、保利協鑫(3800)跌8%、中海集運(2866)跌6%，呢啲本來係弱股，但早前急彈，而家回吓好正常，若是買入呢啲股短炒，最好定個止蝕位，唔10%斬都20%斬，否則萬一睇錯市要坐好耐艇。
炒熱門股必須止蝕
昨日仍有行業隨政策炒高，內地《經濟參考報》報道，中國明年鐵路基建投資和投產里程均可能超過今年水準，投資額或會超過5,160億元人民幣，鐵路相關股即時炒高，其中中鐵建(1186)升超過半成至8.76元、中國南車(1766)漲4.6%至6.8元。阿爺逐個行業推政策去救，講到一個行業就炒起一個。
「熱錢襲港」成為市場焦點，匯豐集團估計目前已經有超過1,000億港元的熱錢流入本地。有分析話「熱錢」除了睇中本地樓市和股市之外，也是炒人仔升值，不過，摩根大通就估計人仔短期內再升的幅度有限。
另外上周末金管局主席陳德霖在網上發表文章，預計熱錢流入會持續一段時間，但預計今一輪淨流入，資金規模應不及2008年至2009年那一次。中環茶友傾起，08年那一次老美救市加資金流入，港股升咗一倍以上，大家都唔期望好似那次咁驚人，但聯儲局每月泵水400億入市場，細細注慢慢食，水流無咁大，但又會否有細水長流的效果？
陳總又唔認同「熱錢」流入本地伺機衝擊內地的講法，佢話香港的離岸人民幣市場已具備相當規模，平均每日交易約20億至30億美元，但大部份的交易是以人民幣兌美元進行。因此，如果海外投資者是看好人民幣的升值潛力，可以在離岸市場用美元買入人民幣，根本不需要和不應該先把美元換成港元，然後再兌換成人民幣白白增加兌換成本。我就話股民唔關心熱錢炒乜，只關心股市會唔會升啫。
陸羽仁
上一頁 下一頁
金融High Tea 舊文
