老外轉向
2012/7/16 上午 09:18:02
網誌分類: 經濟
當大家都覺得中國第二季GDP得7.6%一如預期咁衰時，老外卻視為中國「軟著陸」的好消息，再加上摩根大通銀行早前因「倫敦鯨事件」對沖虧損20億美元，市場估計摩根大通二季業續會好大劑，誰知摩根大通上週五發布成績表卻出乎意料地好，帶動整個歐美金融板塊乘機大幅炒上，摩根大通炒高6%，美銀漲4.6%，係表現最好的兩隻杜指成份股，杜指上週五勁升203點至12777點，收復整個星期所有失地。
儘管摩通單計「倫敦鯨事件」投資CDS(信貸違約調期)令虧損由上季估計的20億美元大幅增加至44億美元，但仍成近50億美元進賬，合每股1.21美元，盈利雖較去季下滑8.7%，但仍遠高於市場預期的0.7美元。
彭博社走訪手持大約100萬股摩根大通的股票的股神巴菲特，佢話「我個人認為此事不會造成影響。如果你做的是大事業，那麼你就需要對業績的大幅波動做好準備。」巴菲特表示，相對於美國運通在上世紀六十年代因欺詐醜聞而遭受的損失，摩根大通此次受到的影響要小得多，摩根大通的股價也將很快出現反彈。
股神出口術聲援摩通，或許唔想銀行股俾人踩得太盡，因為佢係富國銀行的主要股東，富國銀行上週五公佈二季業績亦交到功課，因房屋抵押貸款收入大增，利潤同比漲17%，亦好過預期。富國房貸業績有意外驚喜，除了顯示美國樓市唔係表面睇咁差外，亦因為佢，執死雞得利，富國早前從其他銀行低價收購房貸業務，結果那些業務比想像中好，就在業績反映番出來。或許市場對金融股睇得太淡，或許因為市場預期太低，或許因為大戶唔係在壞消息見光時炒起唔會搵到食，總而言之，壞消息係可以變成好消息。
中國經濟都係咁。中國公佈第二季GDP較去年增長7.6%，係三年以來首次「破8」。但老外評論家睇到呢個數字，卻認為中國經濟走弱但遠不至於崩潰，唔會硬著陸，摩根大通指中國經濟已經進入軟著陸通道。
又有老外傳媒指中國將要不斷出措施刺激經濟，其貨幣政策過去一個月明顯轉向於較寬鬆，目的係推動中國經濟能夠在下半年復甦。瑞穗證券首席經濟學家沈建光表示，中國日前的降低利率、注入流動資金、投放貸款以及審批通過更多基建項目等措施都「指向同一個方向，我們可能會在第四季度看到(經濟)強力復甦。」
老外對中國的口徑，似乎開始由擔心中國硬著陸，到而家信中國全年增長可以「保八」。其實中國保八無乜難度，第一季增長8.1%，第二季7.6%，第三、四季只要有平均8.15%增長，就可保八，要求並唔係太高。若老外對中國經濟的投資情緒改善，香港中資股亦可以慢慢復甦。
陸羽仁
回應(7) 我想回應
陸羽仁 BLOG 舊文
