中環在線：霍外父又嫁女喇 - 李華華
霍建寧
龍年除咗催生龍B，仲係辦喜事既最佳日子，好似和黃(013)大班霍建寧嚟緊周末又有出閣之喜，今次係二女霍尚怡出嫁。
華華舊年11月先至恭喜完霍大班大女霍尚欣出嫁，估唔到短短七個月後二女亦都要嫁人，俗語都有話，女兒係爸爸前世嘅情人，今次兩個女都搵到歸宿，相信霍大班都可以放下心頭大石啦。
和黃大班嫁女，梗係去番李超人旗下酒店啦，二女同大女尚欣(圖)一樣，喺北角海逸君綽酒店擺酒。
女婿又係老外
大家都知，霍大班做會計出身，而兩個女都同老竇一樣，投身金融界，大女尚欣做過高盛，而喺英國劍橋聖三一學院法律系畢業嘅尚怡，未畢業就已經獲得大摩垂青，一樣咁叻女。咁啱得咁蹺，大女同二女都係嫁外國人。
霍大班嫁女當然大陣仗，華華收到風，二女今次婚宴安排同大女一樣，都喺超人李嘉誠旗下北角港島海逸君綽酒店擺酒，睇番上次大女先擺咗30幾圍，以霍大班級數算係「小兒科」，據講今次城中富豪名人都已經收到帖，睇嚟都要擺多幾圍至夠坐。
此外，相信賓客最期待嘅就係婚宴餘慶節目，上次大女出嫁，愛好古典音樂嘅霍大班就親自落場彈琴，仲請埋著名鋼琴家郎朗做表演嘉賓，唔知今次會唔會請李雲迪呢？
上一則: 內地高利貸風險憂蔓延至銀行
下一則: 中環在線：金管局前女將過檔高盛 - 李華華
中環在線 - 李華華 舊文
