舉一反三
2014年01月30日
港股歲晚收爐，昨日更為期指結算，人行近期持續放水，內地的流動性於春節前夕較為寬裕，帶動大市出現反彈。以前港股年尾多數例旺，皆因打工仔出咗雙糧花紅，有人會諗吓買股儲錢，但呢兩年受到內地銀根漸緊影響，係呢啲埋數日子，內地拆息經常抽升，變成股市負面因素，歲晚市場情緒反而仲敏感𠻹，去到收爐日子，即係話就快捱到埋數，拆息係春節後應會紓緩，於是大戶乘機夾高指數。
港股於期指結算日成功止跌回升，重返22000關上。恒指高開後後最多升262點，見22222點。大市於高位欠承接，隨後呈窄幅上落格局，全日收報22141點，升180點。投資者觀望聯儲局會否繼續縮減買債規模，加上農曆新年長假期前夕，成交只有683億元。
反浮誇 高檔消費無運行
個市升勢集中，騰訊(700) 股價彈力最強，收報532元，再升5.8%，是港股回升最大功臣，為恒指貢獻101點升幅。電能實業(006) 分拆的港燈電力(2638) 首日收報5.34元，較招股價5.45元低2%，每手500個單位，不計手續費蝕55元。今天半日市，睇吓會唔會係蛇年最後一日浮番上水面，好好睇睇過年嘞。
係大市反彈百幾點下，仲有幾隻藍籌股創出一年新低，值得留意係在近年在內地重錘出擊的恒隆地產(101) ，佢係上海營運的商場非常成功，集團於是將呢個模式不斷複製去其他地產，在不少二線城市好似瀋陽、濟南興建高檔商場，呢的消費點無論設計同用料都係一流，係內地景氣日子，曾經令市場大為憧憬，但隨着內地消費放緩，呢啲頂級商場消費會唔會受影響，開始成為投資者腦海中的疑問。
有中環茶友最近從北京回來，佢話市面真喺靜咗好多，以前年尾馬路例牌塞爆，送禮的汽車絡繹於途，但今年已經不見此現象；同樣，好多豪華會所不是被當局查封，就是捱不住結業，新領導層向浮奢風氣宣戰，對於高檔消費打擊巨大。
收爐結算谷高內銀
內地消費不被看好，恒隆地產股價亦除除滑落，一年前佢股價仲有31元，雖然比起幾年前37元已經跌咗20%，點知仲繼續跌跌吓，到昨日收報22元，又再跌去30%，見佢係升市中仍然創出低價收爐，估佢短期都好難有好表現。恒隆老闆陳啟宗係穩陣派，做地產唔會借重債，係逆境都可以守得住。不過，股民落注心態多數係君子不吃眼前虧，如果公司短期要打守勢波，股價就算跌咗落嚟，都無必要心急入貨啦！舉一反三，其他經營模式相似的內房或地產股，情況相信都唔差得好遠嘞。
昨日內銀股向好，市場解釋之一係根據《上海證券報》引述消息，1月份銀行貸款投放較快，至26日為止，4大國有行的新增貸款約為4300億元人民幣，按年上升10%。
新增貸款表現良好，4大行昨日全面走高，近期跌勢好急的工行(1398) 勁升4%，如此升幅可謂相當少見，但新增貸款數字好啲抑或差啲，只係短期表現，唔等同內地銀行業面臨改革整頓呢個大環境有改善，內銀股反彈，好可能只係大戶為咗結算，揀件重磅又夠平的股份嚟發功唧。
陸羽仁
金融High Tea 舊文
