2014年4月4日星期五
冇數計的藝術
話說阿梅早前因「獨到」地貼中了阿里收購高德的交易之後，一直被受各方友好讚頌。
我雖然心知只是符碌撞棍，而且買得雞碎咁多， 財政上根本毫無得着，但由於大家很熱情，盛情難卻，再加埋自我感覺良好， 我忍不住再度化身玲玲師傅，跟好友們預言下隻被阿里相中的目標。
「登登登登，銀泰（1883）是也」， 我說，「跟馬雲諗熟，又菜鳥，又O2O……」， 接着分析一大餐。
前日銀泰宣佈阿里入股，第一個反應是，「買馬又唔見咁準？」。最大的問題當然是，我一股銀泰都沒有。「算了，即使荷包沒進賬，但有得認叻威威，都好過冇啦。」 心諗。
消息公告復牌開市，正當我打算到處認叻之際，銀泰的股價竟然來過180度轉彎……大挫! 嚇了一跳。結果是，攞威不成，卻執返身彩。股市真是無奇不有。
所謂炒作 買的僅是一個夢
及後有分析解說指出，作價不佳，攤薄太大云云。OK。有數計的，你話估值唔好。 一隻冇數可計的中信21（241） 同另一隻冇人識計的文化中國（1060），反而可借機大炒特炒。結論是，所謂炒作，買的只是一個夢。有數計的，頂多只是個小綺夢，不入流。冇數計的，才算得上是個春秋大夢，大茶飯也。
經過一輪衝鋒陷陣，業績期話咁快就過。跟去年的觀察一樣，大部分公司的收入增長皆見呆滯，但同時成本卻持續飛升。以前有Topline頂住，即使費用上升，盈利也能保得住。現在已經沒有這支歌仔唱，也引證了克強總理的見解︰保增長是解決所有問題的關鍵。假如GDP增長大幅放緩，問題便會逐漸浮現。
上周見曼聯主場大敗給同市死敵曼城，球迷起哄要莫帥下台，身為利記的死硬粉絲，理應心涼才是，但竟有點同情。又或者是因為，沉淪得實在太快了。 就好似隻新股王Magnum（2080）一樣，雖然預咗熱潮遲早會減退， 但下跌的速度也未免有點太誇張了，或者遇上衰領隊，同遇上衰股票一樣， 放手都要夠狠。
財經DNA - 阿梅 舊文
