中環在線：港航搵大孖沙
沖淡中資背景
■香港航空若能加強本土航空公司味道，或者可以帶來好消息。 設計圖片
香港航空嘅上市計劃一再延期，本月初仲話上市申請失效，要重新遞交申請。聞說，港航舊年申請上市以來，一直被人質疑佢嘅股東背景，𠵱家佢嘅大股東係內地海南航空，為減淡中資成份，港航就諗緊引入本地大孖沙或者國際知名基金入股做策略性股東。
暫定賣股一成
港航原本打算喺舊年底上市，集資近四十億元，但係拖到今年初都冇聲氣，本月初直情話上市申請失效，即係起碼要更新盤數，再交畀港交所（338）重新處理。
雖然港航一直標榜自己係二○○六年在港註冊成立嘅本土航空公司，但佢大股東係海南航空。聞說，佢申請上市以來，單係呢一點就已經惹來唔少爭議。於是佢哋就諗到條好計，就係努力搵本地大孖沙或者國際基金入股，暫定入股比例大約一成。
其實呢條唔係乜嘢新計仔，澳洲航空旗下捷星航空與東方航空（670）合作在港創立捷星香港前年就引入賭後何超瓊旗下信德（242）做股東，增加港資成份，希望方便獲發牌。不過，喺國泰（293）與港航反對下，捷星香港仲未申請到營運牌照。
不過，呢個只係港航嘅如意算盤，眾所周知，今時今日，航空公司經營唔容易，面對越來越多廉價航空，機票價格持續受壓，萬一油價回升，又要處理成本上升壓力，本港大孖沙多數淨係賣樓都發到豬頭咁，有幾多人有興趣拎十億、八億出來投資航空公司呢？據聞，姓李嘅富豪就冇乜興趣嘞。
港航努力吧，或者可以繼續引入港式食品，好似雞蛋仔、蛋撻，甚或麥嘜等港產公仔去加強本土航空公司味道囉。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
